Միջկրոնական երկխոսության Պապի խորհուրդը հատուկ հաղորդագրություն է ուղարկել աշխարհի նշանավոր բուդդայական համայնքներին՝ այդ կրոնի գլխավոր տոնի` Վեսակի (Բուդդայի ծննդյան, լուսավորման և Նիրվանայի մեջ ընկղմվելու օրը) մոտենալու կապակցությամբ։ Այս մասին չորեքշաբթի օրը հաղորդել է Վատիկանի ռադիոն:
Ուղերձը ստորագրած խորհրդի ղեկավար, կարդինալ Ժան-Լուի Թորանը Հռոմի Պապ Բենեդիկտոսի անունից ուշադրություն է դարձնում բուդդիզմում երիտասարդությանն առաքինի դաստիարակելու դարերով արմատավորված փորձին, որը «հասարակության համար թանկարժեք շնորհ է»:
Փաստաթղթում նշվում է որ բուդդիզմը երիտասարդությանը սովորեցնում է «խուսափել ուրիշներին վնասելուց և լինել շռայլ ու կարեկցող»: Վատիկանի կարդինալը հայտարարել է, որ այս արժեքները բուդդիզմի կոնկրետ ներդրումն են երիտասարդ սերնդի դաստիարակման մեջ, ովքեր արդյունքում «սովորում են կիսել պատասխանատվությունը և համագործակցել ուրիշների հետ»:
«Այնտեղ, որտեղ հավուր պատշաճի, ինչպես բուդդիզմի ավանդության մեջ, վերաբերում են կրթության խնդրին, ամրապնդվում է մշակույթների և կրոնների միջև երկխոսությունը»,– ասվում է Վատիկանի ուղերձում։
Վեսակը տոնում են վայշակխա ամսվա առաջին կիսալուսնի օրը:Սա գլխավոր տոնն է, որի ժամանակ բուդդիստները հիշում են Բուդդայի վերջին ծննդյան օրը, լուսավորումը և Նիրվանայի մեջ ընկղմվելը: Այս իրադարձությունները տեղի են ունեցել տարբեր թվականներին, սակայն համաձայն միֆի՝ նույն օրը:
