Ճարտարապետների միությունը ամիսներ առաջ վարձակալության հիմունքներով տարածք էր տրամադրել Ավետարանական եկեղեցուն՝ շաբաթական մեկ անգամ երկու ժամով իրենց հավաքները կազմակերպելու համար: Պարզվում է՝ տարածքը վարձակալողները աղանդավորներ են: Այսօր լրագրողների հետ հանդիպմանը Ճարտարապետների միության նախագահ Մկրտիչ Մինասյանն ասաց, որ իրենք ապօրինի գործարք չեն կնքել՝ կազմակերպությունը գրանցված է եղել պետության կողմից։
«Ինձ դիմեց ավետարանականների առաջնորդ Ռենե Լևոնյանը, ես չգիտեի, որ տարածքը տալիս եմ աղանդավորների: Ինչպես գիտեք, Ավետարանական եկեղեցուն չի մերժում մեր եկեղեցին, դրա համար էլ տվեցի»,- ասաց Ճարտարապետների միության նախագահը:
Ինչպես նշեց Մկրտիչ Մինասյանը, պայմանագրի համաձայն՝ յուրաքանչյուր վարձակալության համար տրվել է 60.000 դրամ, որը ծախսվել է շենքի ծախսերը հոգալու համար: Բանախոսն ասաց՝ եթե տարածքը ցանկանային վարձակալել մորմոնները կամ այլ աղանդավորական կառույց, ինքը երբեք նրանց չէր տրամադրի այն, որովհետև գիտի՝ նրանք աղանդավորներ են։
Տեր Շմավոն քահանա Ղևոնդյանի համոզմամբ՝ եթե անգամ օրինական են կազմակերպության փաստաթղթերը, տարածքը չպիտի տրամադրվեր, քանի որ դա դեմ է քրիստոնեական վարվելակերպին. «Այս դեպքում պետք է ոչ թե օրենքը գործեր, այլ քրիստոնյային հարիր պահվածքը»:
Ասուլիսի մյուս բանախոսի՝ Համագործակցություն հանուն ժողովրդավարության կենտրոնի նախագահ Ստեփան Դանիելյանի կարծիքով՝ համաձայն ՀՀ Քրեական օրենսգրքի 160 և 162-րդ հոդվածների՝ այն մարդիկ, ովքեր խոչընդոտում են խղճի և ազատության իրավունքներին, ռասայական և կրոնական խտրականություն են քարոզում, ինչը քրեորեն պատժելի է. «Հիմա մեր երկրում ոչ մի օրենք չի գործում, այ, եթե գործեր, Տեր հայր, ձեզ կմեղադրեին, մինչև անգամ կձերբակալեին»:
Նա հայտարարեց, որ մեր երկիրը հիմնականում հոգևորականներն են հարստահարում, և եթե կրոնական կազմակերպությունների հանդեպ բռնություն է կիրառվում, նրանք պիտի բողոքեն, ընդհուպ մինչև հավաքվեն Ազատության հրապարակում:
Ի պատասխան՝ Տեր Շմավոն քահանա Ղևոնդյանն ասաց՝ նման մի քանի հայտարարությունները բավական են Առաքելական եկեղեցու հիմքերը իրոք թուլացնելու համար. «Քիչ չէ՝ ունենք 70 կուսակցություն, որոնք պառակտում են երկիրը, հիմա էլ գրանցված են 65 աղանդավորական կազմակերպություններ: Իհարկե, հոգևորականների մեղքն էլ կա, քանի որ մենք պատրաստ չէինք դիմակայել աղանդավորներին: Մի օրինակ բերեմ՝ Երևանում 800.000 մարդու համար կա 33 հոգևորական»:
Նշենք, որ Ճարտարապետների միությունում այլևս տվյալ աղանդավորական կառույցը հավաքներ չի կազմակերպում: Իսկ նախագահն ասաց, որ իրենք իրականացնում են ազգանվեր գործունեություն, և կարիք չկար հարցը այսքան մեծացնել:
