«Միասնական շտաբ ստեղծելու հռչակագիրը խմբագրման կարիք ունի»,- այսօր Հայաստանի քաղաքագետների միությունում կայացած պլենար նիստի ընթացքում հայտարարեց ՀՅԴ անդամ Արմեն Ռուստամյանը: Նա նշեց, որ նույնիսկ նորմալ ընտրություններ անցկացնելու մասին բարձրաձայնելու անհրաժեշտություն չկա:
«Ես ասեմ, որ այս գաղափարը` միասնական շտաբի ստեղծման, մենք տասը տարի է՝ արծարծում ենք, 2002 թվականին նույնիսկ մոտ քսան կուսակցությունների հետ քննարկեցինք, սակայն մեկ-երկուսի անհամաձայնության պատճառով նախաձեռնությունը չիրականացավ: Եթե ընտրությունները չդառնան այն գործիքը, որով հնարավոր է իշխանափոխություն իրականացնել, ապա մենք կստանձնենք արդար ընտրություններ անցկացնելու պատասխանատվությունը: Գլխավոր խնդիրը՝ կանխել ընտրակեղծիքները: Մենք իսկապես շատ լուրջ հարց ունենք և հայտարարության մեջ մի քանի ձևափոխություններ պետք է կատարենք՝ պետք է հստակեցվեն միասնական շտաբի նպատակը և խնդիրները»,- նկատեց Արմեն Ռուստամյանը։
ՀՅԴ անդամը ընդգծեց, որ միանում է ՀԱԿ-ի այն դիմումին, որով Ոստիկանությունից պահանջում են ներկայացնել հանրապետությունից մշտապես բացակայող մարդկանց ցուցակը:
Քաղաքագետների միությունում իրենց կուսակցության տեսակետը ներկայացրեց ՀՀԿ պատգամավոր Գալուստ Սահակյանը: Նա տեղեկացրեց, որ դեռ տասն օր առաջ միջազգային կառույցների հետ քննարկման արդյունքում ԱԺ-ն մի նմանատիպ հռչակագիր հրապարակեց, որը ստեղծում է նույն տիպի կառույց. դրան կարող են մասնակցել ոչ միայն ընտրություններին մասնակցող քաղաքական ուժերը, իսկ նպատակը արդար ընտրությունների անցկացման հնարավորություն ապահովելն է:
Քաղաքագետների միությունում քաղաքական ուժերի ներկայացուցիչները առաջարկում են խմբագրել հռչակագրի տեքստը, որը մի քանի օրից կստորագրվի ղեկավարների կողմից և ավելի մեծ կարևորություն կստանա: ՀՀԿ պատգամավոր Գալուստ Սահակյանն էլ առաջարկեց ԱԺ ձևավորված հռչակագիրը դարձնել քննարկման առարկա, որը, ըստ նրա, ավելի մեծ կարևորություն և նշանակություն ունի:
Քննարկման մասնակիցները առաջարկեցին, որպեսզի նման քննարկումների մասնակցեն բոլոր քաղաքական ուժերի ներկայացուցիչները, քանի որ պլենար նիստին ներկա են միայն հինգ քաղաքական ուժեր:
Հիշեցնենք, որ ըստ հռչակագրի՝ կուսակցությունները մեկական ներկայացուցիչ պետք է տրամադրեն միասնական և կուսակցության կենտրոնական շտաբների միջև կապ ստեղծելու և ընտրակեղծիքները բացահայտելու նպատակով:
