Ճապոնիայի մայրաքաղաք Տոկիոյում այսօր սպասվում է 1959 թվից հետո ամենուժեղ փոթորիկը։ Տոկիոյում հետաձգվել են հարյուրավոր ավիաչվերթներ, կանգնեցվել է գնացքների երթևեկությունը, տասնյակ հազար աշխատակիցների համար աշխատանքային օրն ավարտվել է սովորականից վաղ:
Bloomberg-ը հաղորդում է, որ փոթորկի պատճառով արդեն մեկ մարդ մահացել է, 6 մարդ տարբեր աստիճանի վնասվածքներ են ստացել:
Ըստ Ճապոնիայի օդերևութաբանական գործակալության՝ փոթորիկը ձևավորվել է Ճապոնական ծովի վրա և այժմ անցնում է երկրի տարածքով: Տոկիոյում քամու արագությունը կհասնի 90 կմ ժամի, իսկ ափամերձ շրջաններում ալիքի բարձրությունը կարող է գերազանցել 10 մետրը: Այդ պատճառով հետաձգվել են նավթի լցանավերի լիցքավորման աշխատանքները, հնարավոր է՝ դադարեցվեն նավթավերամշակման գործարանների աշխատանքները:
Այս պահին Տոկիոյի օդանավակայանում իրենց չվերթին են սպասում 32 հազար ուղևոր: All Nippon Airways-ը չեղյալ է հետաձգել է 139, Japan Air-ը՝ 160 չվերթ: Առայժմ խոսքը միայն ներքին ավիահաղորդակցման մասին է, սակայն չի բացառվում նաև միջազգային չվերթների հետաձգումը:
