«Եթե բոլոր կուսակցությունները միավորվեն և համատեղ ջանքերով ստուգեն ընտրացուցակները ու հաստատեն, այդ դեպքում հնարավոր կլինի անցկացնել արժանահավատ ընտրություններ, այլապես կլինեն, ինչպես միշտ՝ չընտրություններ»,- այս մասին լրագրողների հետ հանդիպմանն ասաց Հայաստանի քաղաքագետների միության նախագահ Հմայակ Հովհաննիսյանը:
Նա նշեց, որ ըստ մարդահամարի տվյալների՝ Հայաստանում կա 2 մլն 780 հազար մարդ. «2 մլն 780 հազարից 2 մլն 485 հազարը գրանցված է որպես ընտրող, ինչը անհավանական ցուցանիշ է, քանի որ ԱՎԾ-ի տվյալներով՝ ՀՀ-ում կա 560 հազար դպրոցական և 185.000 նախադպրոցական տարիքի երեխա: Արդյունքում ստացվում է, որ 745 հազար մարդ ընտրելու իրավունք չպետք է ունենա: Սա մեկ անգամ ևս ապացուցում է, որ նշված թիվը հեռու է իրականությունից»:
Բանախոսի համոզմամբ՝ ամենաարդար ընտրությունները եղել են 1991 թվականի անկախության հանրաքվեի ժամանակ. «Քաղաքագետների միությունը պաշտոնապես հայտարարում է, որ պատրաստ է գրասենյակը տրամադրել միասնական շտաբի ձևավորման նպատակով: Մեզ համար շատ կարևոր է, որ այս ընտրությունները տարբերվեն նախորդներից՝ լինեն ազատ և անկախ»:
Համատեղ ասուլիսի ժամանակ քաղաքագետ Լևոն Շիրինյանը հայտնեց՝ եթե այս ընտրությունները ևս լինեն նախորդների նման, ապա շատ հնարավոր է, իշխանափոխությունը կատարվի այլ տարբերակով։
«Աֆրիկյան երկրներում իշխանափոխությունը գրեթե միշտ կատարվում է հեղափոխության միջոցով: Մենք չենք ցանկանում, որ մեր երկրում ևս իշանափոխությունը նման ճանապարհով տեղի ունենա: Այս ընտրությունը ռուբիկոն է, և ոչ ոք խարդախություն անելու իրավունք չունի»,- ասաց Լ. Շիրինյանը:
Ըստ Շիրինյանի՝ Հայաստանում պետք է ձևավորվի քաղաքական մշակույթ և պետք է արվի ամեն ինչ այդ մշակույթի մակարդակը բարձրացնելու համար. «Մենք պետք է ոչ միայն ասենք, այլև անենք: Ինչքան ուժ ունենք՝ պետք է ծառայենք այդ գործին»:
