Մինչ այժմ, ներիշխանական ՀՀԿ-ԲՀԿ տիրույթից բացի, իշխանության մեջ ակնհայտորեն առկա էր նաև բախում և հակադրություն ՀՀԿ ներսում, որտեղ տարբեր տնտեսական խմբեր մրցակցում են իշխանությունում առավել ազդեցիկ տեղի և դերի համար: Սակայն, ներկայումս, կարծես թե նմանօրինակ իրավիճակ է առաջանում նաև Բարգավաճ Հայաստան կուսակցությունում, որտեղ թվում էր, թե ամեն ինչ հստակ և ուղղահայաց է և կուսակցությունը առանց շեղումների ենթարկվում է Գագիկ Ծառուկյանին: Նախկին արտգործնախարար, Ռոբերտ Քոչարյանի հավատարիմ զինակից Վարդան Օսկանյանի անդամակցումից հետո, Բարգավաճ Հայաստանում կարծես թե նշմարվում են երկվության նշաններ:
Համենայն դեպս, հետաքրքրական էր օրերս արձանագրվածը: Հարցազրույց տալով «Ազատություն» ռադիոկայանին, նորընծա կուսակցական Վարդան Օսկանյանը հայտարարել էր, որ իշխող կոալիցիան եղել է ձևական և ՀՀԿ-ն չուներ Բարգավաճ Հայաստանի ձայների կարիքը: Այդ հայտարարությանը հետաքրքրական անդրադարձ էր կատարել ԲՀԿ նախագահի մամուլի խոսնակ Խաչիկ Գալստյանը, ով հայտարարել էր, թե Վարդան Օսկանյանն այդ կարծիսը հայտնել է որպես անհատ վերլուծաբան: Ուշադրություն դարձրեք, ոչ թե որպես անհատկ կուսակցական, այլ անհատ վերլուծաբան:
Փաստորեն, ԲՀԿ-ն ոչ միայն շեշտում է Օսկանյանի կարծիքի անհատականությունը, այլ նույնիսկ նվազագույն՝ կուսակցական կապն է փորձում ծածկել կամ քողարկել: Մինչդեռ, Վարդան Օսկանյանը իր հարցազրույցում բավական հստակ կուսակցական դիրքերից էր հանդես եկել այն առումով, որ հայտարարել էր, թե հաջորդ խորհրդարանում այդօրինակ ստատուս-քվոյի պարագայում ինքը պնդելու է, որ ԲՀԿ-ն այլևս կոալիցիա չկազմի ՀՀԿ-ի հետ: Այսինքն, նախկին արտգործնախարարը բավական հստակ կուսակցական գիծ է նշմարում, ինչի պարագայում հայտարարել է, թե նա հանդես է գալիս որպես անհատ վերլուծաբան, մեղմ ասած նշանակում է փոքր ինչ խուսափել իրականությանն ուղիղ նայելուց և նսեմացնել սեփական կուսակցի դիրքորոշումը:
Չի բացառվում իհարկե, որ այս ամենը ոչ թե վկայում է, որ ԲՀԿ ներսում կարող է հակադրություն առաջանալ Վարդան Օսկանյանի և կուսակցության այսպես ասած հիմնական, ավանդական հատվածի միջև, այլ հանդիսանում է ընդամենը կուսակցական մարտավարության տարր: Այսինքն, այն հայտարարությունները, որոնք այսպես ասած խնդրահարույց կարող են լինել իշխանության առաջ, բայց հաճելի՝ հասարակության համար, ԲՀԿ-ն փորձում է անել նոր անդամ Վարդան Օսկանյանի միջոցով, հետո դրանք վերագրելով այսպես ասած անհատ վերլուծաբանությանը:
Մի կողմից, Բարգավաճ Հայաստանի ղեկավարությունն այդպիսով կշարունակի բարիդրացիական հարաբերությունը ՀՀԿ-ի հետ, մյուս կողմից կփորձի պահպանել այսպես ասած ընդդիմադիր իմիջը հասարակության առաջ, նպաստելով ձայների հավաքագրմանը: Հարցն այստեղ իհարկե այն է, որ դրանից հետո բնականաբար առաջանալու է հենց Վարդան Օսկանյանի իմիջի հարցը, որովհետև եթե Բարգավաճ Հայաստանն այդ նախընտրական մարտավարությունից հետո, ընտրությունն անց առաջնորդվի իր ավանդական մարտավարությամբ, ապա Վարդան Օսկանյանին թերևս հարկ կլինի կամ, այսպես ասած, իշխանափոխություն անել ԲՀԿ-ում, կամ պարզապես դուրս գալ կուսակցությունից, եթե կան քաղաքական առավել լուրջ ծրագրեր և մտադրություններ:
