«Հարավային միջանցքի մասին Ադրբեջանի և Եվրամիության ընդունած հռչակագիրը ոչ ավել, ոչ պակաս, Ադրբեջանի առաջին գրավոր փաստաթուղթն է Եվրոպա գազի առաքման մասին»։ Այս կարծիքն է հայտնել Բրեմենի համալսարանի Արևելյան Եվրոպայի ուսումնասիրության կենտրոնի փորձագետ Անդրեաս Հայնրիխը: news.az-ին տված հարցազրույցում նա կասկած է հայտնել Ադրբեջանի կողմից Nabucco խողովակաշարով անհրաժեշտ 30 միլիարդ խորանարդ մետր գազ առաքելու հնարավորության մասին՝ չնայած Շահդենիզ հանքավայրում հայտնաբերվել է 1,2 տրիլիոն խորանարդ մետր գազի պաշար: Հայնրիխը կարծում է, որ Ադրբեջանը կարող է Nabucco-ով առաքման համար հատկացնել միայն մոտ 10 միլիարդ խորանարդ մետր գազ, ինչը խողովակաշարի անհրաժեշտ ծավալների միայն մեկ երրորդն է, բացի այդ, Բաքվում դեռ պետք է հստակեցնեն, Եվրոպա առաքումների որ տարբերակին առավելություն տալ, քանի որ կա առաքման ևս երկու տարբերակ` Տրանսադրիատիկ և Թուրքիա-Հունաստան-Իտալիա խողովակաշարերը: Այս տարբերակները հիմնվում են թուրքական գազային համակարգի վրա և կարճ են ադրբեջանական գազի առաքման համար: Թուրքմենստանի` Nabucco-ին միանալու հավանականության մասին Հայնրիխն ասել է, որ, չնայած մինչ այժմ եղած դրական ազդակներին, իշխանությունների անկանխատեսելիության պատճառով դեռ հնարավոր չէ հստակ կանխատեսել Աշգաբադի քայլերը: Պետք է նաև հաշվի առնել, որ Թուրքմենստանի պատրաստակամության դեպքում անհրաժեշտ է լինելու վերափոխել այդ երկրի գազատրանսպորտային համակարգն ու Կասպից ծովի հատակով խողովակաշար կառուցել մինչև Ադրբեջան: Անդրադառնալով Nabucco-ի մրցակից համարվող ռուսական Հարավային հոսք նախագծին՝ Հայնրիխը կարծիք է հայտնել, որ ՌԴ վարչապետ Վլադիմիր Պուտինի հավանությունը ստանալու դեպքում այն կարող է ազգային նշանակության նախագիծ դառնալ, սակայն դրա իրականացումը գրեթե կրկնապատիկ ավելի թանկ է Nabucco-ից: Իսկ վերջինս էլ լուրջ խնդիրների առաջ կկանգնի, եթե Թուրքմենստանը չմիանա նախագծին: