«Մոլորակի ժամ» համաշխարհային ակցիան առաջին անգամ մեկնարկել է 2007 թվականին՝ Ավստրալիայի Սիդնեյ քաղաքում, որտեղ 2 միլիոն մարդ անջատել էին իրենց լույսերը: Ակցիայի հիմնական նպատակն էր` միավորել մարդկության ջանքերը` կլիմայի փոփոխության դեմ մղվող պայքարում: Գնալով այն ձեռք բերեց մեծ հեղինակություն` ապահովելով ավելի քան մեկ միլիարդ բնակչության մասնակցություն ամբողջ աշխարհում:
2011 թվականին «Մոլորակի ժամին» մասնակցել են ավելի քան 5200 քաղաքներ 135 երկրներում, որոնց թվում էին 89 մայրաքաղաքներ: Հայաստանն արդեն 4-րդ տարին է մասնակցում այս ակցիային: Այս տարի միացել են նաև Վանաձորը և Կապանը: «Մոլորակի ժամը» տեղի կունենա ամբողջ աշխարհում՝ 2012 թվականի մարտի 31-ին, տեղական ժամանակով ժամը 20:30-21:30: Երևանում, Կապանում և Վանաձորում մեկ ժամով կանջատվեն խորհրդանիշ հանդիսացող շենքերի, հրապարակների, օբյեկտների արտաքին լուսավորությունը ու էլեկտրաէներգիան, ինչպես նաև պողոտաների և փողոցների լուսավորությունը:
Խոսելով «Մոլորակի ժամի» մասին` Բնության համաշխարհային հիմնադրամի հայաստանյան մասնաճյուղի ներկայացուցիչ Արթուր Խոյեցյանը նշեց. «Ակցիայի հիմնական նպատակն է ցույց տալ, որ եթե մարդիկ միավորվեն, կարող են լուծել գլոբալ մի շարք խնդիրներ: Սա մի գործողություն է, որը խորհրդանշում է բնապահպանական խնդիրների լուծումը»:
ՀՀ բնապահպանության նախարարության մթնոլորտային օդի քաղաքականության բաժնի պետ Մարտին Ծառուկյանը նշեց, որ բնապահպանական խնդիրների պատճառը բարոյագիտական ոլորտում է. «Մարդկանց վարքն ուղղված է ավելի շատ նյութական բարիքներ ձեռք բերելուն: Դա արտադրողների մեղքն է: Երբեմն մարդիկ ձեռք են բերում այնպիսի ապրանքներ, որոնք իրենց նույնիսկ հարկավոր չեն: Արդյունքում մեր ռեսուրսներն օգտագործվում են որպես թափոն»: Ըստ նրա` աշխարհը մեկ ընտանիք է, և այդ մեկ ժամը, երբ մարդիկ դուրս կգան իրենց առօրեական վիճակից, գուցե հասկանան, թե ինչպես կարող են ճիշտ կազմակերպել իրենց կյանքը. «Մարդիկ պետք է հասկանան` մոլորակը բոլորինն է և պետք է այն խնայողաբար օգտագործել»:
