Այսօր լրագրողների հետ հանդիպմանը տնտեսագետ Սամվել Ավագյանը խոսեց այն մասին, թե որքանով են նախընտրական գործընթացները ազդում տնտեսության վրա` նշելով երկու` ուղղակի և անուղղակի ազդեցություններ. «Ուղղակի ազդեցությունները արտահայտվում են մանրածախ առևտրաշրջանառության, հրատարակչական բիզնեսի, գովազդային բիզնեսի, մեդիա դաշտի և փոխարժեքի ոլորտներում: Եթե դիտարկենք 2007 թվականի խորհրդարանական ընտրությունները, կնկատենք, որ այդ ընթացքում միայն մանրածախ առևտրում արձանագրվել է 11 մլրդ դրամի աճ, հրատարակչական բիզնեսում՝ մոտ կրկնակի աճ»:
Տնտեսագետի հավաստմամբ՝ աճը պայմանավորված է նրանով, որ իրականացվում են բազմաթիվ սոցիալական ծրագրեր և բաժանվում են ընտրակաշառքներ. «Այսինքն՝ 11 մլրդ-ի ցուցանիշով կարելի է գնահատել, թե մոտավորապես որքան է կազմել ընտրակաշառքների ծավալը»:
Տնտեսագետը նաև նշեց, որ նախընտրական շրջանում նվազում է ներդրումային ակտիվությունը, քանի որ դաշտը ակտիվորեն ներգրավվում է քաղաքական գործընթացների մեջ: Իսկ պոպուլիստական խոստումները, որոնք տրվում են իշխանությունների և ընդդիմության ներկայացուցիչների կողմից, բացասաբար են անդրադառնում կառավարության ծրագրերի վրա:
Խոսելով փետրվարին Ռուսաստանում տեղի ունեցած նախագահական ընտրությունների մասին՝ տնտեսագետը նշեց, որ Պուտինի քարոզարշավը վերջին տասնամյակի ամենաշռայլ և ամենաթանկ նախընտրական քարոզարշավն է. «Համաշխարհային բանկի գնահատականով՝ Վլադիմիր Պուտինի նախընտրական խոստումների ամբողջությունը մոտավորապես համարժեք է ՀՆԱ-ի 1.5 տոկոսին: Այսինքն՝ եթե նա իր խոստումներն իրականացնի, պետք է ՀՆԱ-ի 1.5 տոկոսի չափով ավելացնի պետական բյուջեի ծախսերը»:
Սամվել Ավագյանի մոտավոր հաշվարկներով՝ մեր երկրում քաղաքական գործիչների նախընտրական քարոզարշավի ընթացքում ամսվա կտրվածքով կծախսվի մոտ 70 մլն դոլար:
