Արաբական պետությունների լիգայի պետքարտուղար Նաբիլ Ալ-Արաբին հայտարարել է, որ Սիրիայի քաղաքական ապագան պետք է որոշի այդ երկրի ժողովուրդը: Նրա խոսքերով՝ քաղաքական գործընթացը կարող է երկար ժամանակ պահանջել, բայց արյունահեղությունը պետք է անմիջապես դադարեցնել:
Ավելի վաղ արաբական երկրներն ընդունել էին «Բաղդադյան դեկլարացիան», որի մեծ մասը նվիրված է Սիրիայի իրավիճակին: ԱՊԼ առաջնորդները սատարել են «սիրիացի ժողովրդի ձգտումները և օրինական պահանջները` ուղղված ազատությանն ու ժողովրդավարության հաստատմանը»: Դրա հետ մեկտեղ նրանք քննադատել են բռնությունը և սպանությունները, սակայն դրանց պատասխանատվությունը կողմերից ոչ մեկի վրա չեն դրել: Արաբ առաջնորդները մերժել են օտարերկրյա միջամտությունը սիրիական հակամարտությանը:
Հատկանշական է նաև, որ, Թունիսի նախագահից բացի, արաբական առաջնորդներից ոչ մեկը չի պահանջել Բաշար Ալ-Ասադի հրաժարականը: Ավելին, արաբական երկրների առաջնորդների մեծ մասը դեմ է արտահայտվել Սիրիայի ընդդիմությանը զինելու գաղափարին։
