Ինդոնեզիայում պատրաստվում են արգելել կարճ շրջազգեստները, քանի որ դրանք ստիպում են, որ տղամարդիկ «որոշ բաներ անեն»: Այս օրենքը կմտնի պոռնոգրաֆիայի դեմ ուղղված օրենքների ցուցակ:
Ինչպես գրում է Daily Mail-ը, մուսուլման երկրի հոգևոր հարցերով զբաղվող նախարարն ասել է, որ իրենք պատրաստվում են պոռնոգրաֆիկ համարել նաև «ծնկից վեր կիսաշրջազգեստ կրելը»:
Նախարար Սուրյադհարմա Ալին մինի շրջազգեստների դեմ պատերազմ էր սկսել անցած ամսվանից: Խորհրդարանի խոսնակ Մարզուկի Ալլեն նույնպես վերջերս դեմ էր խոսել կարճ շրջազգեստներին, բայց նրա խոսքը հիմնականում վերաբերում էր կին քաղաքական գործիչներին:
Ալլեն ասել է, որ իրենք պատրաստում են օրենքի նախագիծ, որով կին քաղաքական գործիչներին կարգելվի կարճ կիսաշրջազգեստներ կրել, քանի որ վերջերս բռնաբարության շատ դեպքեր են եղել, և դրա պատճառն այն է, որ կանայք պատշաճ հագուստներ չեն կրում:
Խոսնակն ավելացրել է. «Դուք գիտեք, թե ինչպիսին են տղամարդիկ: Նման հագուստները կարող են նրանց ստիպել որոշ բաներ անել»:
