Երեկ Կրթության և գիտության նախարարությունում նախարարի հետ կայացած հանդիպման ընթացքում երիտասարդ գիտնականները և նախարարը վերջապես համաձայնության են եկել ՀՀ նախագահ Սերժ Սարգսյանի կողմից որպես աջակցություն տրամադրված 100 մլն դրամի վերաբերյալ: Երիտասարդ գիտնականների և նախարարի միջև հանդիպումները շարունակվում էին երկար ժամանակ, և կոնսենսուս չէր ձևավորվում, սակայն երեկ ձեռք բերած համաձայնությունը գոհացնում է «Պահանջում ենք գիտության ֆինանսավորման ավելացում» նախաձեռնության երիտասարդ գիտնականներին: Այս մասին «Առաջին լրատվական»-ի հետ զրույցում տեղեկացրեց նախաձեռնության անդամ, երիտասարդ ֆիզիկոս Արթուր Մովսիսյանը`խոսելով երեկ ժամը 18.00-ին նախարարությունում կայացած հանդիպման շուրջ:
Ըստ նրա` աշխատակարգը հաստատվել է, և բոլոր տարաձայնությունները վերացվել են, ծրագրային մասը նույնպես պատրաստ է: «Ծրագրային ուղղություններն են գիտական գործունեություն, գիտակազմակերպչական գործունեություն, մրցանակաբաշխություն, գիտական դրամաշնորհներ, կոնֆերանսներ և այլն: Այս ծրագիրը որոշել են երիտասարդ գիտնականների ղեկավար մարմնի ինը ներկայացուցիչները»,- մանրամասնեց երիտասարդ ֆիզիկոսը` հավելելով, որ վերջնական արդյունքը գոհացուցիչ է, և ամեն բան հիմա պատրաստ է, որ ծրագրերը սկսեն իրականացվել:
Հիշեցնենք, որ Սերժ Սարգսյանը երիտասարդ գիտնականներին տրամադրել էր 100 մլն դրամ գումար:
