Իսպանիայի կազմի մեջ մտնող Բելեարյան կղզիների դատարանը դադարեցրել է դատական լսումները Սաուդյան արքայազն Ալ-Վալիդ բին Տալալի դեմ, որը մեղադրվում էր Իբիցայում 2008 թ. օգոստոսին 20-ամյա ֆոտոմոդելի բռնաբարության մեջ:
Ինչպես հաղորդում է բրիտանական The Daily Telegraph-ը, դատարանի որոշման մեջ ասվում է, որ եղած փաստերը հնարավորություն չեն տալիս վստահ սահմանել, թե ինչ է տեղի ունեցել 2008 թ. օգոստոսի 11-ի լույս 12-ի գիշերը արքայազնի զբոսանավի վրա: Դատարանը նաև նշել է, որ հայցվոր աղջկա ցուցմունքներն անորոշ են և հակասական: Գործը կարող է վերաբացվել, եթե քննությունը նոր վկայություններ ունենա:
Աղջիկը, որը ենթադրյալ հանցագործության պահին եղել է 20 տարեկան, հայտարարում է, որ իրեն հրավիրել են զբոսանավ, այնուհետև իր բաժակի մեջ ինչ-որ թմրանյութ են լցրել: Նրա խոսքերով ինքը շատ չի խմել, սակայն, չգիտես ինչու, քնել է զբոսանավում և զարթնել է՝ իր վրա զգալով տղամարդու մարմի ծանրություն:
Արքայազնի պաշտպաները հայտարարում են, որ Ալ-Վալիդը ոչ մի կերպ չի կարող մեղավոր լինել, քանի որ այդ ժամանակ նա եղել է Ֆրանսիայում՝ իր կնոջ, երեխաների և թոռների հետ՝ «տասնյակ վկաների շրջապատում»:
Ալ-Վալիդի դեմ գործը Իբիցայում փակվել է 2010 թ.: Դրա համար հիմք է ծառայել բժշկական փորձաքննությունը, որը բռնաբարության ոչ մի հետք չի հայտնաբերել: Սակայն հայցվոր կողմը բողոքարկել է որոշումը Բելեարյան կղզիների դատարանում:
Ալ Վալիդ բին Տալալը համարվում է աշխարհի ամենահարուստ մարդկանցից մեկը: Նրա կարողությունը, Forbes-ի հաշվարկներով, գնահատվում է 18 մլրդ դոլար:
