Ամերիկյան Facebook աշխարհի խոշորագույն սոցիալական ցանցը պատրաստվում է այս տարվա մայիսին անցկացնել (IPO) բաժնետոմսերի նախնական բաշխում: Ինչպես տեղեկացնում է Финам FM-ը ՝ այս մասին գրում է The Wall Street Journal-ը:
Այս շաբաթ ընկերությունը դադարեցրել է բաժնետոմսերի վաճառքը երկրորդային շուկայում՝ իր բաժնետոմսերի ճշգրիտ քանակը որոշելու համար:
Facebook-ն ակնկալում է տեղաբաշխման ընթացքում ստանալ մինչև 10 մլրդ դոլար, ինչը ինտերնետ ընկերության համար կլինի ռեկորդային: Որպես գործարքի առաջատար կազմակերպիչներ են հանդես գալիս Morgan Stanley, JPMorgan և Goldman Sachs ընկերությունները:
Մինչ IPO-ն Facebook-ը համարվում է մասնավոր ընկերություն, և նրա բաժնետոմսերը չեն վաճառվում ավանդական բորսաներում: Սակայն ընկերության բաժնետոմսերի սեփականատերերը կարող են իրենց բաժինները վերավաճառել այլընտրանքային էլեկտրոնային բորսաներում, ինչպիսիք են, օրինակ, SharesPost-ը և SecondMarket-ը:
Որպես վաճառող են հանդես գալիս, սովորաբար, աշխատողները կամ նախկին ներդրողները, իսկ որպես գնորդ՝ ներդրումային ընկերությունները:
Facebook-ը պահպանում է առաջատարի իր տեղը սոցիալական ցանցերում և շարունակում է ակտիվորեն մեծացնել իր ֆինանսական ցուցանիշները:
2011 թ. Facebook ստացել է 1 մլրդ դոլարի մաքուր շահույթ, որը 65 տոկոսով գերազանցում է 2010 թ. ցուցանիշները: Միևնույն ժամանակ ընկերության եկամուտները նախորդ տարվա համեմատ աճել են 88 տոկոսով՝ հասնելով 3.7 մլրդ դոլարի:
