Մեղրի ՀԷԿ-ի շինարարական աշխատանքները կմեկնարկեն 2012թ. հունիսի 15-ից: Մինչև հունիսի 1-ը պետք է վերջնականացվի Թույլտվության պայմանագրի ուժի մեջ մտնելու նախապայմանների ապահովումը: Այս մասին «Առաջին լրատվական»-ի հարցադրմանն ի պատասխան հայտնեցին ՀՀ էներգետիկայի և բնական պաշարների նախարարությունից:
ՀՀ էներգետիկայի և բնական պաշարների նախարարության և «Թավան Աբ Արազ» ընկերության միջև Փոխըմբռնման հուշագիրը ստորագրվել էր 2011 թ. դեկտեմբերի 23-ին ԻԻՀ նախագահի` Հայաստան կատարած այցի ընթացքում: Արաքս գետի վրա հիդրոէլեկտրակայաններ կառուցելու ծրագիրն իրականացվում է Հայաստանի և Իրանի կառավարությունների միջև 2007թ. մարտի 19-ին ստորագրված միջկառավարական համաձայնագրի հիման վրա, որի վավերացման գործընթացը երկու երկրների խորհրդարանների կողմից ավարտվել է դեռևս 2008 թվականին:
Նախարարության համաձայն՝ մարտի 2-ին Իրանում կայացած խորհրդարանական ընտրությունների արդյունքները որևէ կերպ չեն ազդի Մեղրի ՀԷԿ-ի կառուցման ծրագրի իրականացման վրա:
Հիշեցնենք, որ ծրագրի գործնական իրականացման նպատակով 2010թ. հոկտեմբերի 15-ին ՀՀ կառավարության` ի դեմս ՀՀ էներգետիկայի և բնական պաշարների նախարության և իրանական ներդրող` «Թավան Աաբ Արազ» ընկերության միջև ստորագրվել է Թույլտվության պայմանագիր` Մեղրի ՀԷԿ-ի ծրագիրը «Կառուցում-տնօրինում-շահագործում-փոխանցում» (BOOT) սկզբունքով իրականացնելու վերաբերյալ:
