Մեկ տարի առաջ՝ 2011-ի մարտին, նախագահականում կայացած խորհրդակցության ժամանակ Սերժ Սարգսյանի հայտնի խոսքը, թե «բոլոր կանխատեսումները խոսում են այն մասին, որ մենք ունենալու ենք դրամի շատ դանդաղ ու կայուն արժեզրկում` առանց որևէ նկատելի թռիչքների ողջ տարվա ընթացքում», այսօր իրականություն է:
«Պատվերով», թե առանց «պատվերի», անցած մեկ տարում ՀՀ դրամը 6.2%-ով արժեզրկվեց: Ազգային վիճակագրական ծառայության տվյալների համաձայն՝ 2011թ. հունվարին ԱՄՆ դոլարն արժեր 364.95 դրամ, 2012թ. հունվարին՝ 387.53 դրամ:
Դոլարի փոխարժեքի շատ սահուն վերելքը դեռ շարունակվում է և ներկայիս միտումների պահպանման դեպքում այս տարվա սեպտեմբեր-հոկտեմբերին այն կարող է հասնել 400 դրամի: Նման կանխատեսում «Առաջին լրատվական»-ի հետ զրույցում արեց FOREX Club-ի վերլուծաբան Միքայել Վերդյանը: Ըստ նրա՝ ներկայում դեպի Հայաստան իրանցի զբոսաշրջիկների հոսքը դադարելուց հետո դրամի կտրուկ՝ 4-5 % արժեզրկում չի կարող լինել, քանի որ անհրաժեշտության դեպքում, եթե շուկայում նկատվի ԱՄՆ դոլարի դեֆիցիտ, Կենտրոնական բանկը կմիջամտի և փոխարժեքի փոփոխությունն այդքան մեծ չի լինի:
Մոտակա դիմադրության մակարդակը, վերլուծաբանի կարծիքով, դոլարի համար 395 դրամ գնային մակարդակն է, որից հետո միայն ԱՄՆ դոլարը կարող է փորձել շարժվել դեպի 400 գնային մակարդակը. «Բայց դրա համար երկար ժամանակ է անհրաժեշտ և արտարժույթի պահանջարկի աճ պետք է լինի, իսկ այդ միտումները այսօր շուկայում դեռ գոյություն չունեն»:
