ԱՄՆ պաշտպանության քարտուղար Լեոն Պանետայի հավաստիացումները, որ Պենտագոնը պատրաստակամ է աջակցել ՀՀ պաշտպանության նախարարությանը, ընդամենը խորամանկ քայլ է՝ վերահսկելու ու կառավարելու իրենից ավելի թույլին: «Առաջին լրատվական»-ի հետ զրույցում նման տեսակետ հայտնեց «Ղարաբաղ» կոմիտեի նախկին անդամ, ՀՀ առաջին նախագահի ազգային անվտանգության գծով նախկին խորհրդական Աշոտ Մանուչարյանը:
«Հիմա աշխարհում ընդունված է ասել, որ բոլորը բոլորին կօգնեն՝ Պենտագոնը ՀՀ պաշտպանության նախարարությանը, ՀՀ պաշտպանության նախարարությունը՝ Պենտագոնին և այլն: Բայց սա ընդամենը հարաբերությունների աստիճանակարգ ձևավորելու մի գործիք է, ինչ-որ բաներ վերահսկողության տակ վերցնելու գործընթաց: Նմանօրինակ հանդիպումները խորամանկության դրսևորում են, որոնցով աշխարհի հզորները վերահսկում ու կառավարում են ավելի փոքրերին: Այս ամենը, սակայն, երկրորդական է, առաջնայինը քաղաքականությունն է, և եթե քաղաքականության շնորհիվ Հայաստանը լինի այնպիսին, ինչպիսին մեր ներքին էությունից է բխում, և փորձենք ստեղծել այն, ինչ մեր պատկերացումների մեջ է, ապա բոլոր հարաբերություններն ուրիշ բանի կբերեն: Իսկ առայժմ Հայաստանն ինքն իրեն ոչնչացնող աշխարհի մաս է, և այս ամենն այդ տրամաբանության մեջ կատարվող ծիսակարգ է»,- նշեց Մանուչարյանը:
Հարցին՝ ԱՄՆ ռազմական գերատեսչության հետ հարաբերությունների սերտացումն արդյո՞ք ռուսական կողմի հաշվին է, նա պատասխանեց. «Երբ Ռուսաստանը փորձի այս աշխարհից իր բաժին կարկանդակը փախցնել, այն ժամանակ էլ կերևա՝ Հայաստանի այս հարաբերությունները կխանգարե՞ն այդ գործընթացին, թե՞ կնպաստեն»:
