Ամերիկյան հայտնի երգիչ Ֆրենկ Սինատրայի և մյուս դասականների երգերը վիրահատության ժամանակ օգնում են հիվանդներին չլարվել, ինչպես նաև արդյունավետ են հետվիրահատական, վերականգնողական շրջանի համար: Հիթերը, ինչպիսին է I’ve got you under my skin-ը, մեծ ազդեցություն են թողնում այն հիվանդների վրա, որոնք վիրահատության ժամանակ արթուն են` այսինքն` վիրահատվում են տեղային անզգայացմամբ:
Օքսֆորդի Ջոն Ռեդքլիֆի հիվանդանոցի վիրաբույժները հենց այսպես են հանգստության մթնոլորտ ստեղծում վիրահատարանում: Երաժշտությունը վիրահատարանի անբաժան մասնիկը դարձավ այն բանից հետո, երբ հետազոտվեցին 96 հիվանդներ: Նրանց կեսը վիրահատության ժամանակ ենթարկվեց երաժշտական թերապիայի, իսկ մյուս մասը վիրահատվեց սովորական պայմաններում: Փորձը ցույց տվեց, որ սովորական պայմաններում վիրահատվողների մոտ լարվածությունից սրտի աշխատանքի և շնչառության ռիթմն արագացել է, մինչդեռ երաժշտության առկայության դեպքում պատկերն այլ է:
Հետազոտության արդյունքների հրապարակումից հետո շատ վիրաբույժներ իրենց հիվանդների հոգեկան հանգստությունը վստահում են Բեթհովենին, Վիվալդիին և Սինատրային:
