Google-ը վաճառել է ամենամյա Google I/O համաժողովի տոմսերը 28 րոպեի ընթացքում,- հաղորդում է Droid Life բլոգը:
Տոմսերի վաճառքը սկսվել է համաժողովի պաշտոնական կայքում երեքշաբթի` մարտի 27-ին, տեղի ժամանակով ժամը 18:00-ին:
Անցյալ տարի Google I/O համաժողովի տոմսերը վաճառվել էին 59 րոպեում:
Տոմսերի գինը ուսանողների համար 300 ԱՄՆ դոլար է, իսկ առանց ուսանողական զեղչի՝ 900 դոլար:
Համաժողովը տեղի կունենա հունիսի 27-29-ը Սան Ֆրանցիսկոյում:
Տոմսերի մեծ մասը գնել են դիլերները, որոնք Google-ի վաճառքից անմիջապես հետո տոմսերը հանել են eBay աճուրդի՝ նախնական 4.5 հազար դոլար արժեքով:
Google հաճախ է ասուլիսի այցելուներին նոր սարքավորումներ տալիս: Այսպես՝ Google I / O 2011-ի մասնակիցներն ընկերության կողմից ստացել են Samsung Galaxy Tab 10.1 պլանշետներ:
Google I / O-ը նախատեսված է ծրագրավորողների համար: Համաժողովի շրջանակներում անցկացվում են Google-ի ապրանքների և տեխնոլոգիաների մասին սեմինարներ:
Ենթադրվում է, որ Google-I / O 2012-ին ընկերությունը կցուցադրի Android-ի նոր տարբերակը՝ Jelly Bean կոդավորված անվանումով, ինչպես նաև Nexus պլանշետը:
Google I/O համաժողովը անցկացվում է 2008 թվից, որին մասնակցում է ավելի քան 5 հազար մարդ: 2012 թ. համաժողովն առաջին անգամ կանցկացվի 3 օր, մինչ այդ Google I / O-ը անցկացվում էր 2 օր:
