Նշանավոր գիտնական, մտածող Ալբերտ Էյնշտեյնի գլխուղեղի հատվածները ԱՄՆ-ից տեղափոխել են Լոնդոն, որտեղ դրանք կդառնան «Ուղեղը՝ իբրև նյութ» ցուցահանդեսի առանցքային տարրը,- հաղորդում է ԻՏԱՌ-ՏԱՍՍ-ը:
Էյնշտեյնի ուղեղի կողքին է նաև ամերիկացի հանցագործ, սերիական մարդասպան Էդվարդ Ռուլոֆի ուղեղը, որը մոտ 140 տարի առաջ հանցագործի մահապատժից հետո հանվելով՝ համաշխարհային սենսացիա է գրանցել, քանի որ ամենամեծն էր ըստ ծավալի, որ երբևէ գրանցել էր գիտությունը:
Ցուցահանդեսը կազմակերպվում է հանրահայտ բրիտանական Wellcome հիմնադրամի սեփական պատկերասրահում:
Մեծ ֆիզիկոսի ուղեղի հատվածները Լոնդոն են բերվել Ֆիլադելֆիայի Թոմաս Մյութերի անվան բժշկական թանգարանից:
Հիշեցնենք, որ Էյնշտեյնի մահից հետո 1955 թ. Թոմաս Հարվի անունով պաթոլոգ-անատոմը հեռացրել էր հանճարի ուղեղը և պահել իրեն, ինչը մահացած գիտնականի հարազատների բողոքների հետևանքով մեծ սկանդալ էր հարուցել: Հարվին կորցրել էր աշխատանքը, սակայն պահել էր Էյնշտեյնի ուղեղը: Ձգտելով հասկանալ, թե արդյոք հանճարի ուղեղը տարբերվում է սովորական մարդկանց ուղեղից՝ պաթոլոգ-անատոմը ԱՄՆ տարբեր գիտնականների է ուղարկել այդ ուղեղի կտրվածքները: Այսպիսով մի մասը հայտնվել է բժիշկ Ռորք-Էդամսի մոտ, որը որոշել է հանձնել դրանք Մյութերի անվան թանգարանին:
‘
