Այսուհետ Նյութ Գինգրիչի ընտրական քարոզարշավը լուսաբանելու են միայն հեռուստալրագրողները, իսկ այլ ԶԼՄ-ների ներկայացուցիչներ այդքան մեծ ուշադրություն չեն դարձնի դրան: Այս մասին հաղորդել է Politico-ն:
Մարտի 23-ին Գինգրիչի շտաբից իրենց թղթակիցներին հետ են կանչել Politico-ն և Atlanta Journal Constitution-ը: Associated Press-ի թղթակիցը լքել է շտաբն այն բանից հետո, երբ Գինգրիչը պարտություն է կրել Լուիզիանայում:
Հեռուստալրագրողները նախկինի պես կհետևեն Գինգրիչին՝ ամբողջ երկրով մեկ:
Ներկա պահին հանրապետականների կողմից նախագահի հիմնական թեկնածուներն են՝ Միթ Ռոմնին և Ռիք Սանտորումը: Associated Press գործակալության տվյալների համաձայն՝ Միթ Ռոմնին ունի 568 պատգամավորների աջակցությունը, Սանտորումը` 272, Գինգրիչը` 135:
Չնայած այն հանգամանքին, որ Գինգրիչը հետ է մնում Ռոմնիից և Սանտորումից, նա չի պատրաստվում հետ կանգնել նախընտրական պայքարից: Այս մասին Գինգրիչն ասել է CNN-ին տված հարցազրույցի ժամանակ:
Պալատի նախկին խոսնակ Գինգրիչի, որպես հանրապետականների կողմից առաջադրված նախագահի թեկնածուի, հնարավորությունները լուրջ կերպով սկսեցին ընկալվել այն բանից հետո, երբ նա հունվարին հաղթանակ տարավ Հարավային Կարոլինայում:
