«Իտալիայի ներկայիս կառավարությունը կարող է վայր դնել իր լիազորությունները՝ մինչ ժամկետի լրանալը` 2013 թվականը, այն դեպքում եթե հասկանան, որ երկիրը պատրաստ չէ կառավարության կողմից առաջարկած բարեփոխումներին»,– երկուշաբթի օրը Սեուլում հայտարարել է Մարիո Մոնտին, ով այնտեղ է միջուկային անվտանգության գագաթնաժողովին մասնակցելու համար։ Այս մասին գրում է РИА Новости-ն:
«Եթե երկիրը քաղաքական և սոցիալական ուժերի միջոցով ցույց տա, որ պատրաստ չէ այն բանին, որ մեր կարծիքով ճիշտ է, մենք, բնականաբար, չենք կարողանա շարունակել աշխատել մինչև լիազորությունների ավարտը»,- Մոնտիի խոսքերը մեջբերում են իտալական ԶԼՄ-ները:
Մարիո Մոնտիի կառավարությունն իշխանության էր եկել անցած տարվա նոյեմբերին՝ քաղաքական ճգնաժամի արդյունքում:
Մոնտիի վարչապետ ընտրվելուց հետո նրա նախորդը` Սիլվիո Բեռլուսկոնին, ով իտալական կառավարությունը ղեկավարում էր 2008 թվականի մայիսից մինչև 2011 թվականի նոյեմբերը, կարծիք է հայտնել, որ կառավարությունը՝ հայտնի տնտեսագետի գլխավորությամբ, կարող է իշխանությունում մնալ մինչև հաջորդ խորհրդարանական ընտրությունները, որոնք տեղի կունենան 2013 թվականին:
Այնուամենայնիվ, վերջին ամիսներին Մարիո Մոնտիի կառավարության կողմից անցկացվող և առաջարկվող բաերփոխումները, մասնավորապես՝ աշխատանքային օրենսդրությանը վերաբերող բարեփոխումը, խիստ քննադատության է ենթարկվում մի շարք քաղաքական կուսակցությունների և սոցիալական կազմակերպությունների կողմից:
