ԱՄՆ-ի նախագահ Բարաք Օբաման պատժել է Արգենտինային, որը չի ցանկացել 300 մլն դոլարի փոխհատուցում տալ ամերիկյան երկու ընկերություններին: Իր հրամանով նա Բուենոս-Այրեսին ժամանակավորապես զրկել է առևտրային զեղչերից՝ Գլխավոր ընդհանրացված համակարգի (GSP) շրջանակներում:
Սպիտակ տան ղեկավարն ասել է. «Ես նպատակահարմար եմ գտնում GSP-ում ժամանակավորապես դադարեցնել Արգենտինայի մասնակցությունը, որովհետև նա չի գործում բարի կամքի շրջանակներում` հրաժարվելով փոխհատուցել երկու ամերիկյան ընկերություններին՝ ըստ դատարանի որոշման»:
Այս որոշումն ուժի մեջ կմտնի 60 օրից:
GSP-ն ստեղծվել է 1974 թ.՝ առևտրի մասին օրենքի համաձայն: Նրա նպատակն առևտրային զեղչերով Վաշինգտոնի գործընկերների զարգացմանը նպաստելն է: Ներկա դրությամբ աշխարհի 129 երկրներ կարող են անվճար կերպով ԱՄՆ բերել շուրջ 4,9 հազարի հասնող լիցենզավորված ապրանքներ, ինչը ձեռնտու է, թե՛ ԱՄՆ-ին, թե՛ այդ երկրներին: Նման արտաքին առևտրի շրջանառությունը կազմում է 18,5 մլրդ դոլար: Այս ծրագրի շրջանակներում Արգենտինայից արտահանվել է շուրջ 477 մլն դոլարի ապրանք, որը կազմում է երկրի ընդհանուր արտահանումների 11 %-ը:
Տնտեսական դատարանը 10 տարվա վաղեմության ներդրումների շուրջ վեճ լուծեց՝ հօգուտ երկու ամերիկյան ընկերությունների` «Ազուրիկսի» ու «Ամերիկայի բանկի», և պարտավորեցրեց Արգենտինային վճարել փոխհատուցում:
«Մենք կոչ ենք անում Արգենտինայի իշխանություններին իրականացնել այդ վճարումները։ Դա թույլ կտա վերականգնել Արգենտինայի մասնակցությունը GSP-ում»,- այսօր առևտրային բանակցությունների ժամանակ հայտարարել է ԱՄՆ-ի ներկայացուցիչը:
