Ֆրանսիայի նախագահ Նիկոլա Սարկոզին կարգելի արմատական իմամներին մուտք գործել Ֆրանսիա` մասնակցելու 2012թ. ապրիլին այնտեղ կայանալիք իսլամական համաժողովին: Այս մասին հաղորդում է Reuters-ը:
Սարկոզին Ֆրանսիայի իսլամական կազմակերպության ներկայացուցիչների հետ հանդիպմանը հասկացրել է, որ «մի շարք հրավիրյալների ուրախ չեն լինի տեսնել ֆրանսիական հողում»: Մասնավորապես, Սարկոզին տվել է եգիպտացի Յուսուֆ Ալ-Կարադավիի անունը, որը մուսուլման սուննիների շրջանում ամենից ազդեցիկ իմամն է: Կարադավին, օրինակ, հաճախ է հայտնվում «Ալ-Ջազիրա» հեռուստաալիքի եթերում, ինչպես նաև IslamOnline կայքում:
Ֆրանսիայի նախագահը նկատել է, որ Ալ-Կարադավիի հետ վիճակը բարդ է, քանի որ իմամն ունի դիվանագիտական անձնագիր ու անգամ Ֆրանսիա մուտք գործելու համար նրան հարկավոր չէ մուտքի անցագիր: Ընդ որում՝ Սարկոզին հավաստիացրել է, որ Կարադավին չի գա համաժողովին, քանի որ ինքը խոսել է Կատարի էմիրի հետ, որտեղ ապրում ու աշխատում է իմամը:
Հիշեցնենք, որ թուլուզյան ահաբեկիչ Մուհամմադ Մերային ոչնչացնելուց հետո Սարկոզին մի շարք հայտարարություններ է արել` խոստանալով պատժել ահաբեկչական կայքերի այցելուներին, ինչպես նաև Պակիստանում ու Աֆղանստանում «Ալ-Քաիդայի» ճամբարներ այցելածներին, անգամ եթե նրանք հանցագործություն չեն կատարել Ֆրանսիայի տարածքում:
