Որքան էլ ՀՀ բնապահպանության նախարարության պատասխանատուները վստահեցնում են, որ օդի աղտոտվածության հարցը նախարարության առաջնային խնդիրներից է, միևնույն է, այդ ծրագրերն այդպես էլ մնում են թղթի վրա: Պաշտոնական տվյալները փաստում են, որ մայրաքաղաքում օդի աղտոտման հիմնական մեղավորները ավտոտրանսպորտային միջոցներն են՝ շուրջ 95%: Մնացած 5%-ը գոյանում է քաղաքում կուտակված աղբի, կանաչ տարածքների նվազման, շինարարության, նաև որոշ ընկերությունների կողմից մթնոլորտ արտանետվող գազերի հաշվին: «Հանուն կայուն զարգացման ասոցիացիայի» նախագահ Կարինե Դանիելյանը սակայն վերջին շրջանում բնապահպանության նախարարությունում նշված տեղեկատվության վերաբերյալ հակադրություն է նկատում: Եթե մինչ այժմ բնապահպանության նախարարությունը պնդում էր, որ մայրաքաղաքի արտանետումերի 90-97 տոկոսը տրանսպորտից է գալիս, ապա վերջերս մոնիտորինգի ղեկավարությունը սկսել է պնդել, որ դա այդպես չէ և տրասպորտի տոկոսն այնքան բարձր չէ: «Այսինքն նույն բնապահպանության նախարարության մեջ միակարծիք չեն: Իհարկե խոսք չկա, որ այստեղ մեծ նշանակություն ունի ավտոտրանսպորտը, սակայն այն, որ վիճակը վատացել է, հենց կոմերցիոն քաղաքաշինության արդյունքն է, երբ շենքերը կառուցվում են միայն ելնելով կառուցողի և ոչ քաղաքի շահերից, պետական կառույցներն էլ լավ գիտակցում են»,-նշում է Կարինե Դանիելյանը: Բնապահպանը համոզված է, որ մայրաքաղաքի օդային ավազանը չի կարողանում մաքրվել, որովհետև քամիները գալիս են ու հասնում պատնեշներին` մեր էլիտար շենքերին: