News Georgia-ի փոխանցմամբ՝ Վրաստանի ԱԳՆ-ը մեկնաբանել է երեկ Հարավային Օսիայում նախագահական ընտրությունների անցկացումը: Այսօր տեղի ունեցած ճեպազրույցի ժամանակ Վրաստանի փոխարտգործնախարար Նինո Կալանդաձեն այդ ընտրությունները որակել է որպես «ֆարս».
«Ցխինվալի շրջանում անցկացված այսպես կոչված նախագահական ընտրությունները ֆարս են և ուղղված են էթնիկ մաքրումների օրինականացմանն ու ժողովրդագրական պատկերի փոփոխմանը:
Բարեբախտաբար, Վրաստանն ու միջազգային հանրությունը միակարծիք են, որ Վրաստանի օկուպացված տարածքներում անցկացված այդ ընտրություններն օրինական չեն: Մենք բացասականորեն ենք գնահատում այսպես կոչված ընտրությունների տեսքով այդ ողջ ֆարսը, որոնք անցկացվել են Վրաստանի օկուպացված տարածքներում, որտեղից վտարվել են հարյուր հազարավոր մարդիկ»:
Հիշեցնենք, որ երեկ Հարավային Օսիայում տեղի ունեցած նախագահական ընտրություններում ոչ մի թեկնածուի չի հաջողվել հավաքել քվեների կեսից ավելին: Ապրիլի 8-ին տեղի է ունենալու ընտրությունների երկրորդ փուլը, որին մասնակցելու են հանրապետության ՊԱԿ-ի նախկին ղեկավար Լեոնիդ Թաբիլովն ու մարդու իրավունքների պաշտպան Դավիթ Սանակոևը:
