Կենտրոնական ընտրական հանձնաժողովը որոշում է կայացրել ԱԺ պատգամավորության թեկնածու Սեդրակ Սարոյանի՝ որպես պատգամավորության թեկնածուի գրանցման հարցը քննարկելու և համապատասխան միջոցառումներ ձեռնարկելու մասով քաղաքացի Հակոբ Հակոբյանի (Ճոյտ) դիմումը վերահասցեագրել թիվ 19 ընտրատարածքային ընտրական հանձնաժողովին: Այսօր կայացած ԿԸՀ արտահերթ նիստի ժամանակ այս մասին հայտարարեց ԿԸՀ նախագահ Տիգրան Մուկուչյանը:
Նրա խոսքով՝ ԱԺ մեծամասնական ընտրակարգով պատգամավորի թեկնածուին գրանցելու և գրանցումը մերժելու գործառույթներն իրականացնում է ընտրատարածքային ընտրական հանձնաժողովը: «Նշվածից ակնհայտ է, որ ներկայացված դիմումը չի կարող հանդիսանալ ՀՀ Կենտրոնական ընտրական հանձնաժողովի քննարկման առարկա: Ուստի դիմումը պետք է հասցեագրվի այն ընտրական հանձնաժողովին, որի իրավասության սահմաններում է բարձրացված հարցի լուծումը»,- նշեց Մուկուչյանը:
Հիշեցնենք, որ դիմումատու Հակոբ Հակոբյանը Էջմիածին քաղաքի թիվ 19 ընտրատարածքում մեծամասնական կարգով ինքնառաջադրվել է ԱԺ պատգամավորության թեկնածու: Նույն ընտրատարածքում ԱԺ պատգամավորության թեկնածու է առաջադրվել նաև Սեդրակ Սարոյանը:
Հակոբյանի կարծիքով՝ Սարոյանը թիվ 19 ընտրատարածքի հանձնաժողովին է ներկայացրել կեղծ տեղեկատվություն պարունակող փաստաթղթեր: Քաղաքացի Հակոբյանի հիմնավորումը հետևյալն է. նրա ունեցած հավաստի տվյալների համաձայն՝ Սեդրակ Սարոյանը վերջին հինգ տարիներին մշտապես չի բնակվել ՀՀ-ում, մինչդեռ ըստ ՀՀ Ընտրական օրենսգրքի 105-րդ հոդվածի և 115-րդ հոդվածի 3-րդ կետի պահանջների՝ ԱԺ պատգամավորության թեկնածուն վերջին հինգ տարում պետք է մշտապես բնակվի Հայաստանում:
Դիմումատուի պնդմամբ՝ Սեդրակ Սարոյանը բացակայել է ԱԺ 267 նիստերից, ինչը կազմում է բոլոր նիստերի 57 տոկոսը: Տևական բացակայության ժամանակաշրջանն, ըստ Հակոբ Հակոբյանի, ընդգրկում է 15.05.2010-ից մինչև 30.11.2011 թվականը: Այդ ամբողջ ընթացքում, ըստ դիմումատուի, Սարոյանը բացակայել է ՀՀ-ից:
