Ա.Արզումանյան. «Թուրքիայի հետ հարաբերությունները պետք է սկսել զրոյից»

Անդրադառնալով հայ-ռուսական պայմանագրի՝ 49 տարով երկարաձգման մասին հարցին` ՀՀ նախկին արտգործնախարար Ալեքսանդր Արզումանյանը հիշեցրեց, որ պայմանագրի ժամկետը դեռևս չէր լրացել: «Երկարաձգումը վկայում է կողմերի` միմյանց չվստահելու մասին»,- ասաց Ալեքսանդր Արզումանյանը: Նա հիշեցրեց, որ պայմանագրի ժամկետը պետք է լրանար 2019 թ., և երկարաձգումը ոչ մի տրամաբանության մեջ չի մտնում: Հայ-թուրքական հարաբերությունների առնչությամբ Ալեքսանդր Արզումանյանը ասաց, որ կողմերը պետք է նստեն սեղանի շուրջ և քննարկումները սկսեն զրոյից: Հայ ազգային կոնգրեսի ներկայացուցիչը կանխատեսեց, որ ՀՀ ներկայիս իշխանությունները, չունենալով լեգիտիմություն, ամեն ինչ անելու են, որ ԼՂ հարցի լուծումը ձգձգեն և պահպանեն ստատուս-քվոն: «Առաջին լրատվականը» ՀՀ նախկին արտգործնախարարից հետաքրքրվեց, թե այսօրվա իշխանություններն ունե՞ն արդյոք ռեսուրս, որպեսզի կարողանան Թուրքիայի հետ բանակցությունները սկսել զրոյից, եթե հաշվի առնենք, որ թուրքական կողմը առաջ է քաշում նախապայմաններ: «Մեր հարաբերությունները եղել են զրոյական: Թուրքիայի կողմից նախապայմանների առաջքաշումը ես ճիշտ չեմ համարում: Կարծում եմ, պետք է շարունակենք և միջազգային հանրությանն էլ բացատրենք, որ առանց նախապայմանների հարաբերություններ հաստատելն է ճիշտ»,- ասաց Ալեքսանդր Արզումանյանը: Նա հավելեց նաև, որ Թուրքիան, շրջափակման մեջ պահելով Հայաստանը, ներքաշվում է կոնֆլիկտի մեջ: