Ըստ ՀՀ կրթության և գիտության նախարար Արմեն Աշոտյանի` այս տարի կշարունակվեն նախնական և միջին մասնագիտական ոլորտներում կատարվող աշխատանքները. «Ինչպես գիտեք, այստեղ գործող ուսումնական հաստատությունների թիվը շատ մեծ է, և մենք գնալու ենք որոշակի բարեփոխումների նաև կառուցվածքային առումով, մասնավորապես` գնալու ենք խոշորացումների այնտեղ, որտեղ դա հնարավոր է:
12 քոլեջներում կշարունակվեն վերանորոգման, վերակառուցման աշխատանքները Եվրամիության համապատասխան աջակցությամբ: Այդ նույն քոլեջներին կտրամադրվեն ժամանակակից լաբորատոր սարքավորումներ, համակարգչային լսարաններ»:
Հայաստանի բուհերում ևս սպասվում են խոշորագույն փոփոխություններ. «Բոլոնիայի գործընթացի տրամաբանությունից ելնելով` մենք պարտավոր ենք Հայաստանում ներդնել որակավորումների ազգային շրջանակ` ըստ կրթական աստիճանների: 2009 թ. ստեղծված Մասնագիտական կրթության որակի ապահովման ազգային կենտրոնը այս տարի արդեն իրականացնելու է փորձնական հավատարմագրում` նոր չափանիշներով երկու բուհ-ի և երկու ծրագրի»,- իր խոսքում նշեց Արմեն Աշոտյանը:
ՀՀ ԿԳ նախարարությունը այս տարի պատրաստվում է իրականացնել նաև բարձրագույն կրթության մասին շրջիկ ցուցահանդես, որը կպատմի Հայաստանի բուհերի, բուհերում մատուցվող կրթական ծառայությունների մասին։ Այդ ցուցահանդեսը համապատասխան դեսպանատների միջոցով կշրջի երկրից երկիր՝ Իրան, Սիրիա, Վրաստան, Ռուսաստան, Լիբանան և այլն:
Արմեն Աշոտյանը ասաց, որ այս տարի կիրականացվի ևս մեկ պիլոտային ծրագիր` ուսանողական վարկերի տրամադրում. «Տարիներ շարունակ քննարկվում էր այս խնդիրը, և այս տարի մենք կսկսենք ուսանողական վարկերի տրամադրման պիլոտային ծրագիրը, որը կիրականացնենք Համաշխարհային բանկի հետ միասին, բանկի տրամադրած միջոցներով»: