«Արտակարգ դրության իրավական ռեժիմի մասին» օրենքն ի սկզբանե հակասահմանադրական է, քանի որ ՀՀ զինված ուժերի միակ խնդիրը երկիրը պաշտպանելն է արտաքին ոտնձգություններից: Այսօր կայացած մամուլի ասուլիսի ժամանակ այս մասին ասաց Հայ ազգային կոնգրեսի իրավական ծառայության համակարգող Գագիկ Ջհանգիրյանը` նշելով, որ օրերս Ազգային ժողովում ընդունված օրենքը կատարյալ հակասության մեջ է երկրի գլխավոր օրենքի հետ:
Նա մեջբերումներ ընթերցեց ՀՀ Սահմանադրությունից` ընդգծելով, որ երկրի նախագահը զինված ուժերի գործադրման իրավունք ունի միայն ՀՀ-ի վրա զինված հարձակման, հարձակման վտանգի և պատերազմ հայտարարելու դեպքերում:
«Երբ բանակը պատերազմում է սեփական ժողովրդի դեմ, պետություններ են կործանվում, և հազարավոր մարդիկ են սպանվում՝ ինչպես Եգիպտոսում ու արաբական մյուս երկրներում: Թե ինչո՞ւ իշխանությունները հենց այս պահին ընդունեցին օրենքը, շատ պարզ է. հասարակության ուշադրությունը բթացած է, իսկ լրագրողական հանրույթի ուշադրությունն այս օրերին մոտեցող ընտրությունների կողմն է ուղղված:
Այնուամենայնիվ, հույս ունենանք, որ օրենքի հանդեպ կգործի գոնե ՀՀ նախագահի վետոն: Իսկ եթե դեպքերն այդպես չզարգանան, մենք բոլոր՝ իրավական, լեգալ ճանապարհներով աշխատելու ենք ցույց տալ «Արտակարգ դրության իրավական ռեժիմի մասին» օրենքի հակասահմանադրականությունը: Բանակը ոչ մի դեպքում չպետք է ներգրավվի արտակարգ դրություններում:
Այո, բանակի անձնակազմը պետք է մասնակցի բնական աղետների հետևանքների վերացմանը` օդուժի, տրանսպորտի միջոցով մարդկանց տարհանելուն, բայց որպես զինմիավոր՝ բանակի գործածումը հակասում է Սահմանադրությանը: Այս օրենքով պարզապես իշխանությունները աշխատում են լեգալացնել 2008-ի մարտի 1-ի իրենց արարքները, համոզել դրանց օրինականությունը»,- ասաց Գագիկ Ջհանգիրյանը:
