Բելառուսի նախագահ Ալեքսանդր Լուկաշենկոն խոստովանել է, որ գոյություն ունի ընդդիմադիրների ցուցակ, որոնց արգելված է դուրս գալ հանրապետությունից: Այս մասին հաղորդում է Interfax-ը՝ վկայակոչելով RT հեռուստաալիքին նախագահի տված հարցազրույցը:
Ավելի վաղ նման ցուցակի գոյության մասին գրել էր TUT.by պարբերականը: Վերջինիս աղբյուրների տվյալներով՝ այդ ցուցակում կա ավելի քան 100 անուն: Երկրի իշխանությունները բազմիցս հայտարարում էին, որ նման ցուցակ գոյություն չունի:
RT-ին տված հարցազրույցում պատախանելով այն հարցին, թե արդյո՞ք նման ցուցակ կազմվել է, Լուկաշենկոն պատասխանել է. «Իսկ մենք արել ենք: Սակայն մենք դեռ չենք գործարկել: Ամբողջ ուժով դեռ չենք գործարկել: Բայց գործարկում ենք»:
Ընդ որում, Լուկաշենկոն նշել է, որ հենց ընդդիմադիրներն են Արևմուտքին դրդել պատժամիջոցներ սահմանլ Բելառուսի իշխանությունների դեմ:
Լրագողի խնդրանքին՝ մեկնաբանել խորհրդարանի նախկին խոսնակ Ստանիսլավ Շուշկևիչի հետ տեղի ունեցած միջադեպը (անցյալ շաբաթ նրան թույլ չտվեցին մտնել Լիտվա)՝ Լուկաշենկոն ասել է. «Ինչ վերաբերում է «թողնել-չթողնելուն», այսօր Եվրամիությունում ընդունված է այսպես կոչված «մուտքի իրավունք չունեցողների» ցուցակ, որի մեջ է նաև ձեր խոնարհ ծառան… Այդ ցուցակն ընդունվել է մեր հինգերորդ շարասյան դրդմամբ, որը գլխավորում է նրա ղեկավարներից Ստանիսլավ Ստանիսլավովիչ Շուշկևիչը»:
Մարտի սկզբից ավելի քան 10 բելառուսցի ընդդիմադիր գործիչների, լրագրողների և հասարակական գործիչների չի թույլատրվել դուրս գալ երկրից:
