ՀՀԿ-ն և ԲՀԿ-ն մեծ թիմեր ունեն, իսկ մնացած կուսակցությունների ցուցակները համեստ են: Այսօր «Առաջին լրատվական»-ի հետ զրույցում նման տեսակետ հայտնեց «Սոցիոմետր» սոցիոլոգիական կենտրոնի ղեկավար, սոցիոլոգ Ահարոն Ադիբեկյանը` խոսելով կուսակցությունների ցուցակների շուրջ: Նա նշեց, որ եթե ասենք, որ կուսակցությունն է ուժեղ, ապա իհարկե ՀՀԿ-ն, որն այդքան մարդ է ընդգրկել իր ցուցակում, հետո ԲՀԿ-ն է, ՀԱԿ-ը, ՀՅԴ-ն:
Ադիբեկյանի խոսքով` ըստ այն հանգամանքի, թե քանիսն են ներկայացված ցուցակում, նշանակում է կուսակցությունը թիմ ունի՞, թե՞ ոչ, իսկ թիմ ունենալն, ըստ նրա, շատ կարևոր հանգամանք է մեր ընտրողների համար: «Կա կուսակցություն մի դեմք ունի, կա կուսակցություն ունի 20 դեմք: Պարզ է, որ մեծ թիմի համար ավելի շատ ձայն տվող կլինի, քան փոքր խմբավորումների: ՀՀԿ-ն բավականին մեծ թիմ ունի, ԲՀԿ-ն` նույնպես, մնացած կուսակցությունների ցուցակներն ավելի համեստ են: Թեև ՀԱԿ-ը հայտարարում է, թե մեծամասնականով 41-ում ինչ-որ մարդ է ներկայացնելու, ես չեմ պատկերացնում տվյալ պահին ՀԱԿ-ում 40 ինչ դեմքեր կան, որ կարող են պայքար տանել համամասնական պատգամավորության համար»,- մեկնաբանեց սոցիոլոգ Ահարոն Ադիբեկյանը:
Խոսելով համամասնական և մեծամասնական ցուցակներից` նա ասաց, որ համամասնական ցուցակները կապ չունեն իրենց ընտրողների թվաքանակի հետ, որովհետև այստեղ առաջին դերակատարում ունեն կուսակցության անունը և հեղինակությունը: Ըստ Ա. Ադիբոկյանի` մարդիկ, ովքեր համամասնական ցուցակով ընտրություն են կատարում, ձայնը տալիս են ընդհանուր կուսակցությանը, թե ով կլինի ցուցակում՝ դա երկրորդական խնդիր է, որովհետև հնարավոր է 200-րդ տեղում ներկայացված թեկնածուն հայտնվի ԱԺ-ում, իսկ 5-րդը կամավոր դուրս գա, քանի որ նա ընդամենը կոչված է գովազդելու կուսակցության ցուցակը: «Մեծամասնական ցուցակը լրիվ այլ բան է: Այստեղ դեմքն ունի մեծ նշանակություն և կուսակցություններն աշխատել են դնել ոչ այնքան ծանոթ քաղաքական գործչի, որքան թեկնածուի անցողիկությունը, իսկ անցողիկ լինելու համար պետք է լինես համայնքում ճանաչված և համայնքի խնդիրներին ծանոթ»,- եզրափակեց իր խոսքը «Սոցիոմետր» սոցիոլոգիական կենտրոնի ղեկավար Ահարոն Ադիբեկյանը:
