Եվրամիությունը նոր պատժամիջոցներ կկիրառի բելառուսցի այն 12 պաշտոնյաների նկատմամբ, ովքեր սերտ կապեր ունեն Լուկաշենկոյի հետ: Սպասվում է, որ այս հարցը կքննարկվի և կընդունվի ուրբաթ օրը Բրյուսելում ԵՄ արտգործնախարարների հերթական գագաթնաժողովի ընթացքում: Այս մասին հաղորդում է «Ազատություն» ռադիոկայանը:
Այդ պաշտոնյաներին կարգելվի մուտք գործել Եվրամիության տարածք, իսկ նրանց անձնական, ինչպես նաև նրանց հետ կապված 29 ընկերությունների ակտիվները կսառեցվեն: Հաղորդվում է, որ «սև ցուցակում» են հայտնվել դատավորներ, դատախազության աշխատակիցներ և գործարարներ: «Սև ցուցակում» նախկինում արդեն գրվել են 230 պաշտոնյաների անուններ:
Սրան ի պատասխան՝ Լուկաշենկոն հաստատել է, որ Բելառուսում գոյություն ունի մի ցուցակ, որում գտնվում են այն մարդկանց անունները, ովքեր չեն կարող լքել Բելառուսի տարածքը: Լուկաշենկոն ընդդիմությանը մեղադրել է այն բանում, որ վերջինս Եվրամիությանն է փոխանցում մարդկանց անուններ և ընկերությունների անվանումներ, որոնց նկատմամբ հետագայում պատժամիջոցներ են կիրառվում:
