Կիրակի օրը` հունվարի 18-ին, Բևեռլի Հիլզում կայացել է «Ոսկե գլոբուս» կինոմրցանակի հանձնման հանդիսավոր արարողությունը: Մրցանակներն ավանդական կարգով տրվում էին դրամա, մյուզիքլ ու կատակերգական ժանրերի ֆիլմերին և հեռուստասերիալներին:
Դրամայի ժանրում, ըստ մրցանակաբաշխության կազմակերպիչների, լավագույն ֆիլմ է ճանաչվել Դեյվիդ Ֆինչերի «Սոցիալական ցանցը»: Այս ժանրում նրա հետ մրցակցում էին «Խոսում է թագավորը», «Սկիզբ», «Սև կարապ» և «Մարտիկ» ֆիլմերը:
Բացի այդ, Ֆինչերը ստացել է նաև լավագույն ռեժիսորի մրցանակը, իսկ ֆիլմի սցենարիստ Ահարոն Սորկինն արժանացել է լավագույն սցենարիստ մրցանակին: Nine Inch Nails խմբի անդամ Տրենտ Ռեզնորի և Ատիկուս Ռոսսի «Սոցցանցի» երգը ճանաչվել է լավագույն սաունդթրեկ:
Տարվա կատակերգական ֆիլմ է դարձել ամերիկացի ռեժիսոր Լիզա Խոլոդենկոյի «Երեխաների հետ ամեն ինչ կարգին է» ֆիլմը:
Դրամատիկական ժանրում լավագույն դերասանուհու համար «Ոսկե գլոբուս» մրցանակը հասել է Նատալի Պորտմանին «Սև կարապը» ֆիլմում թատերապարուհու դերի համար, իսկ նույն ժանրում լավագույն դերասանի «Ոսկե գլոբուս» մրցանակը բաժին է հասել Քոլին Ֆերտին «Խոսում է թագավորը» ֆիլմի համար:
«Մյուզիքլում կամ կատակերգական ժանրում խաղացած լավագույն դերասանուհու» անվանակարգում մրցանակին արժանացել է Աննետ Բենինգը «Երեխաների հետ ամեն ինչ կարգին է» ֆիլմի համար: Նույն անվանակարգում լավագույն դերասանի մրցանակը ստացել է Փոլ Ջիամատին «Բառնիի տարբերակը» ֆիլմի համար: Նշենք, որ այս անվանակարգում երկու անգամ ներկայացված էր Ջոնի Դեպը «Ալիսան հրաշքների աշխարհում» և «Ճանապարհորդը» ֆիլմերի համար:
Երկրորդ պլանի լավագույն դերասան է դարձել Քրիստիան Բեյլը, իսկ նույն անվանակարգի լավագույն դերասանուհի` Մելիսսա Լեոնը: Երկուսն էլ այս մրցանակը ստացել են «Մարտիկը» ֆիլմում խաղալու համար:
Ալեքսեյ Ուչտելի ռուսական «Շրջան» ֆիլմը լավագույն արտասահմանյան ֆիլմ անվանակարգում զիջել է դանիական «Haevnen» ֆիլմին: «Խաղալիքների պատմություն. մեծ փախուստ» մուլտֆիլմը ճանաչվել է լավագույն անիմացիոն գործ:
Դրամատիկական ժանրում լավագույն լայնամետրաժ հեռուստասերիալ է ճանաչվել «Ընդհատակյա կայսրություն» ֆիլմը: Սթիվ Բուշեմին, որն «Ընդհատակյա կայսրությունում» խաղացել է Նակի Թոմսոնի դերը, դարձել է լավագույն սերիալային դերասան: Լիամետրաժ դրամատիկական ժանրի սերիալի լավագույն դերասանուհի է ճանաչվել Կեթի Սագալը «Անարխիայի երեխաները» ֆիլմի համար:
Ալ Պաչինոն դարձել է մինի սերիալի լավագույն դերասան «Դուք չգիտեք Ջեկին» սերիալում Ջեկ Գևորգյանի՝ «Բժիշկ մահի» դերի համար:
Զվարճությունների ոլորտի զարգացման համար պատվավոր «Ոսկե գլոբուս» է ստացել Ռոբերտ դե Նիրոն:
«Ոսկե գլոբուսների» հանձնման արարողությունը, ինչպես անցյալ տարիներին, այս տարի էլ վարել է կատակերգական ժանրի դերասան Ռիկկի Ջերվեյսը: