Թուրքական Zaman թերթի փոխանցմամբ՝ Թուրքիայի Վճռաբեկ դատարանը կայացրել է 2007 թվականի հունվարի 19-ին Ստամբուլում Հրանտ Դինքին սպանած Օգյուն Սամասթի վերաբերյալ իր վճիռը:
Հիշեցնենք, որ 2011 թվականի հուլիսի 25-ին Ստամբուլի 2-րդ անչափահասների ծանր հանցագործությունները քննող դատարանը «ծրագրված սպանություն իրականացնելու համար» (21 տարի և 6 ամիս) և «ապօրինի ճանապարհով զենք կրելու համար» (1 տարի և 4 ամիս և 600 թուրքական լիրա տուգանք) Սամասթին դատապարտել էր 22 տարի և 10 ամիս ազատազրկման։
Վճռաբեկ դատարանը գրեթե անփոփոխ է թողել Սամասթի դատավճիռը: Վճռաբեկ դատարանը որոշել է միայն կրկնակի կրճատել ապօրինի զենք կրելու վերաբերյալ սահմանված տուգանքը՝ այն իջեցնելով մինչև 300 լիրայի (166 դոլար):
Հիշեցնենք, որ Սամասթը հայտարարել էր, թե գիրք է գրելու Դինքի սպանությանը նախորդած և հաջորդած ժամանակահատվածի մասին՝ ընդգծելով, որ եթե Դինքի սպանության գործը վերստին բացվի, ապա պատրաստ է նոր տվյալներ հաղորդել տվյալ գործի շուրջ:
