Մի շարք արաբական և արևմտյան երկրներ գաղտնի դիվանագիտություն են վարում՝ կոչ անելով Սիրիայի նախագահ Բաշար Ալ-Ասադի կողմնակիցներին անցնել ընդդիմության կողմը, քանի որ վարչակարգի տապալումը մոտ է: Այս մասին ասվում է Al-Jazeera հեռուստաալիքի կայքում հրապարակված Սիրիայի իշխանությունների գաղտնի փաստաթղթերում:
Փաստաթղթում, որը, ամենայն հավանականությամբ, ուղարկվել էր Սիրիայի վարչապետի կողմից ՆԳ նախարարին, խոսվում է այն մասին, որ մի շարք արաբական և եվրոպական երկրներ կոչ են անում երկրում իշխող «Բաաս» կուսակցության անդամներին հեռանալ Ասադից:
«Որոշ արաբական և եվրապական երկրներ Սիրիայի դեսպաներին, հյուպատոսներին և այլ դիվանագիտական աշխատակիցների համոզում են, որ վարչակարգը շուտով կտապալվի, և նրանք պետք է անցնեն ընդդիմության կողմը, իսկ իրենք պատրաստ են նրանց ապաստան տալ: Խնդրում եմ, ուշադիր ուսումնասիրեք այս հարցը և անհրաժեշտ միջոցներ ձեռնարկեք»,- ասվում է ուղերձում:
Հրապարակված 5 փաստաթղթերից 2-ում խոսվում է Սիրիայում բողոքի ակցիաները ճնշելու մեթոդների մասին: Դրանցում ասվում է, որ ոստիկանությունը պետք է «օրինական ճանապարհով հաշվեհարդար տեսնի խաղաղ ցուցարարների հետ», և որ անվտանգության ուժերը պետք է «հետևեն գաղտնի ահաբեկչական կազմակերպություններին»:
Նյութերում նաև նշվում է, որ Սիրիայի անվտանգության ուժերը պետք է լայնածավալ գործողություններ իրականացնեն Իդլիբ մարզի քաղաքներն ու գյուղերը, ինչպես նաև Հալեպի շրջակա քաղաքները մաքրելու ուղղությամբ:
Բացի այդ, դրանում ասվում է, որ ցույցերը ցրելու ժամանակ անվտանգության ուժերը պետք է օգտագործեն մահակներ և ոչ թե հրաձգային զենք:
Al-Jazeera-ն նշում է, որ փաստաթղթերը տրամադրվել են Աբդել Մաջին Բարաքաթի կողմից, որը մինչև վերջերս աշխատել է Սիրիայի կառավարությունում, իսկ հետո փախել է Թուրքիա:
