ԱԳՆ մամլո գրասենյակից «Առաջին լրատվական»-ին տեղեկացնում են, որ մարտի 19-ին Աթենքում Հայաստանի դեսպանության հովանավորությամբ և «Հույն-հայկական հետազոտությունների կենտրոնի» գործակցությամբ Հունաստանի ազգային գրադարանի կենտրոնական սրահում տեղի է ունեցել «Հիշելով Վիլյամ Սարոյանին» խորագրով ցուցահանդեսի բացումը:
Ցուցահանդեսի բացմանը ներկա գտնվողներին իր ողջույնի խոսքն է ուղղել Հունաստանում Հայաստանի դեսպան Գագիկ Ղալաչյանը:
Ողջույնի խոսքով հանդես են եկել նաև Ազգային գրադարանի խորհրդի նախագահ, Աթենքի համալսարանի պրոֆեսոր Խառալամպոս Մուցոպուլոսը և գրադարանի գլխավոր տնօրենի տեղակալ տիկին Անտոնյա Արախովան, ինչպես նաև «Հույն-հայկական հետազոտությունների կենտրոնի» քարտուղար Հովսեփ Քասեսյանը:
Վիլյամ Սարոյանին նվիրված բանախոսություններով ելույթ են ունեցել հույն գրող-ակադեմիկոս Թանասի Վալտինոսը և Աթենքի համալսարանի պրոֆեսոր Ֆոտիոս Դիմիտրակոպուլոսը:
Ցուցադրվել են Վիլյամ Սարոյանի բեղմնավոր գործունեությունը ներկայացնող գրքեր, նկարներ, լուսանկարներ և փաստաթղթեր, ինչպես նաև ընթերցվել են հատվածներ մեծ գրողի ստեղծագործություններից: