Սիրիայի հարցով ՄԱԿ-ի և Արաբական պետությունները լիգայի (ԱՊԼ) հատուկ ներկայացուցիչ Քոֆի Անանի նոր տեղակալ է նշանակվել ֆրանսիացի Ժան Մարի Գեննոն: Այս մասին հաղորդում է ITAR-TASS-ը՝ վկայակոչելով ՄԱԿ-ի մամուլի ծառայությունը:
2000-2008 թթ. Գեննոն զբաղեցրել է ՄԱԿ-ի խաղաղապահ գործողություններում գլխավոր քարտուղարի պաշտոնը, իսկ հետո դասախոսել է Նյու Յորքի Կոլումբիական համալսարանում:
Այսպիսով, այժմ Անանն ունի երկու տեղակալ: Մարտի 7-ին Պան Գի Մունի և ԱՊԼ գլխավոր քարտուղար Նաբիլ Ալ-Արաբիի համատեղ որոշմամբ՝ Անանի առաջին օգնական էր նշանակվել պաղեստինցի դիվանագետ Նասեր Ալ-Կիդուան:
Երեկ ՄԱԿ-ի Անվտանգության խորհրդի անդամները փակ դռների ետևում քննարկել են Ֆրանսիայի պատվիրակության ներկայացրած պաշտոնական հայտարարության նախագիծը, որը լիակատար աջակցություն է հայտնում Անանի առաքելությանը: Սակայն փաստաթղթի տեքստի հետ կապված վերջնական համաձայնություն ձեռք չի բերվել: Ֆրանսիայի պատվիրակությունը հայտարարել է, որ կներկայացնի հայտարարության նոր տարբերակ՝ հաշվի առնելով հնչած դիտողություննեըրը: ՄԱԿ-ի Անվտանգության խորհրդում գործող «լուռ» գործընթացի համաձայն՝ եթե այսօր մինչև տեղի ժամանակով ժամը 09:00-ը ՄԱԿ-ի ԱԽ անդամների կողմից որևէ առարկություն չլինի, ապա նախագահի հայտարարությունը մեխանիկորեն ընդունված կհամարվի:
Ի տարբերություն բանաձևերի, ՄԱԿ-ի ԱԽ հայտարարությունները պարտադիր ուժ չունեն: Այնուամենայնիվ, դրանց ընդունման համար պահանջվում է ԱԽ անդամներից 15 ձայն: Բանաձևի ընդունման համար անհրաժեշտ է, որպեսզի դրա օգտին քվեարկի 9 անդամ՝ պայմանով, որ ՄԱԿ-ի մշտական 5 անդամներից (Մեծ Բրիտանիա, Չինաստան, Ռուսաստան, ԱՄՆ կամ Ֆրանսիա) ոչ ոք չօգտվի վետոյի իր իրավունքից:
