ՀՀ պաշտպանության նախարարությունը ընթացք կտա Լեռնային Ղարաբաղի Ասկերանի շրջանի N զորամասում փետրվարի 20-ին «ինքնասպանության փորձ» կատարած 19-ամյա զինծառայող Հրաչիկ Խլղաթյանի մոր` Արմինե Խլղաթյանի կողմից պաշտպանության նախարար Սեյրան Օհանյանին ուղարկված դիմում-նամակին, որում անհույս կինը նախարարին հայտնել էր անհրաժեշտ գումարային օգնության վերաբերյալ: Այս մասին «Առաջին լրատվական»-ին հայտնեց ՊՆ տեղեկատվության և հասարակայնության հետ կապերի վարչության պետ Վարդան Ավետիսյանը` հավելելով, որ բաժնի աշխատակիցներին հանձնարարել է փնտրել զինծառայողի մոր կողմից ուղարկված նամակը, և կհետևեն դրա ընթացքին անմիջապես նախարարի Հայաստան վերադարձից հետո:
«Առաջին լրատվականը» երեկ անդրադարձել էր կոմայից դուրս եկած զինծառայողի ներկա առողջական վիճակին: Արդեն հայտնել էինք, որ այս պահին տղային Երևանի զինվորական կենտրոնական հոսպիտալում առանց հակադիաբետիկ դեղերի պահել հնարավոր չէ, սակայն, չնայած սրան, զինծառայողի մայրը` Արմինե Խլղաթյանը, ըստ տեղի խոսակցությունների, հասկացել է, որ մոտակա մի քանի օրերին տղային պատրաստվում են դուրս գրել և տուն ուղարկել:
Այսօր, սակայն, զինվորի մայրը մեզ հետ զրույցում նշեց, որ, կարծես թե, այդ խոսակցություններն այլևս չեն ծավալվում և դուրսգրման մասին որևէ խոսք առայժմ չկա, բայց իրեն արդեն տեղեկացրել են, որ դուրսգրումից հետո տղային պետք է Երևանում պահել, որպեսզի բժիշկների անմիջական հսկողություն ապահովելու հնարավորություն լինի: Սակայն Արմինե Խլղաթյանը չի էլ պատկերացնում, թե ինչպես պետք է այդ հարցը լուծի, երբ ո՛չ ինքը աշխատանք ունի, ո՛չ էլ ամուսինը, երեխային էլ տանը հետևող է պետք լինելու:
Իսկ ՀՀ Մարդու իրավունքների պաշտպանի գրասենյակի տեղեկատվության և հասարակայնության հետ կապերի վարչության պետ Նաիրա Կարմիրշալյանը «Առաջին լրատվականի» հետ զրույցում նշեց, որ պաշտպանի գրասենյակի արագ արձագանքման խումբը այս պահից արդեն զբաղվում է Հրաչիկ Խլղաթյանի հարցով, մոտ 15 օր առաջ արձագանքման խմբի աշխատակիցներն արդեն եղել են հոսպիտալում, ծանոթացել են 19-ամյա զինծառայողի առողջական վիճակին, ծանոթացել են նաև տղայի ծնողների ու նրանց մտավախությունների հետ, տվել անհրաժեշտ խորհրդատվություն և հետևելու են գործի հետագա ընթացքին:
