Կենտրոնական ընտրական հանձնաժողովի մարտի 19-ի հրապարակած մեծամասնական ընտրակարգով առաջադրած թեկնածուների ցանկից հայտնի դարձավ, որ ԲՀԿ նախագահ Գագիկ Ծառուկյանը խորհրդարանի առաջիկա ընտրություններին իր մենաշնորհած թիվ 28 ընտրատարածքում, որն ընդգրկում է քաղաք Աբովյան, Առինջ, Բալահովիտ, Գետարգել, Մայակովսկի և մի քանի այլ համայնքները, կպայքարի «Երևան ջուր» ընկերության թիվ 10 տեղամասի պետ, անկուսակցական, հանրությանը ոչ այնքան հայտնի Արմեն Ավդալյանի հետ:
Վերջինիս մասին որևէ տեղեկատվություն ստանալը գրեթե անհնարին էր. Արմեն Ավդալյան անուն-ազգանունն առաջին անգամ համացանցում հայտնվեց միայն այդ օրը` ցուցակի հրապարակումից հետո: Երեկ, երբ «Երևան ջուր» ընկերությունից փորձեցինք որոշ մանրամասներ իմանալ նորելուկ թեկնածուի մասին, ընկերության մամուլի ծառայությունից հրաժարվեցին որևէ տեղեկատվություն փոխանցել, անգամ խուսափեցին պատասխանել, թե որտեղ է գտնվում թիվ 10 տեղամասը: «Մենք նման աշխատակից ունենք, բայց նրա քաղաքական դիրքորոշումները չեն ազդում աշխատանքի արդյունավետության վրա»,- միայն սա փոխանցեցին ընկերությունից:
Ավելի ուշ պարզեցինք, որ թիվ 10 տեղամասը, որի պետն է Արմեն Ավդալյանը, գտնվում է Մայակովսկի գյուղում: «Առաջին լրատվական»-ի հետ զրույցում տեղի բնակիչներից շատերն ասում էին, որ Արմեն Ավդալյան անունն առաջին անգամ էին լսում և զարմանքով հետաքրքրվում էին, թե այդ ո՞ր համարձակն է Ծառուկյանի դեմ որոշել մրցապայքարի մեջ մտնել: «Ճիշտ ա, ընտրությունները մոտենում ա, բայց Ծառուկյանը դեռ օգնություն չի եղել, բայց պրազդնիկին-բանին Ծառուկյանը մեզ հիշում ա»,- ասում էին գյուղամեջում հավաքվածները` միևնույն ժամանակ դժգոհելով, թե չնայած «ծառուկյանական» բարեգործություններին, իրենց շրջանում էլ ապրելն օրեցօր դժվար է դառնում ու «խոպանչիների» շարքերն ընդլայնվում են:
Աբովյանցիներից մեկը` Վարդանն էլ ասաց. «Եթե պիստալետը դնեն ճակատիս` հանրապետականներին ձայն չեմ տա»:
«Առաջին լրատվական»-ը հանդիպում ունենալու ակնկալիքով հեռախոսով կապվեց Արմեն Ավդալյանի հետ: «Հիմա շատ զբաղված եմ, ռայոններում են, չեմ կարող խոսել, հետո, հետո զանգեք»,- ասաց նա ու անջատեց հեռախոսը: Այցելելով նրա բնակության վայր` պարզեցինք, որ թեկնածու Արմեն Ավդալյանը մեկ-երկու տարի է` վարձով բնակվում է Աբովյան քաղաքի «զոքանչի լեզվի» մոտ գտնվող շենքի իր բնակարանում: Հետաքրքրական էր, որ Ա. Ավդալյանին չէին ճանաչում ոչ միայն շենքի բնակիչները, այլև անգամ հարևանները: Անկուսակցական համարվող թեկնածուն այստեղ հայտնի էր ոչ թե որպես թիվ 10 տեղամասի պետ կամ առաջիկա ընտրություններին Ծառուկյանի դեմ առաջադրված թեկնածու, այլ «սպիտակ նիվով» և «ծառուկյանական» պետհամարանիշերով Արմեն: Մեզ հետ զրույցում շենքի հարևաններից մեկն ասաց, որ նա հայտնի է որպես Գագիկ Ծառուկյանի թիմի ներկայացուցիչ, ինչպես նաև սեփական բիզնես ունի:
Ստացվում է, որ թիվ 28 ընտրատարածքում Գագիկ Ծառուկյանի մրցակիցը լինելու է իր «անկուսակցական» թիմակիցը:
Նշենք, որ համաձայն Ընտրական օրենսգրքի, կուսակցությունը յուրաքանչյուր ընտրատարածքում իրավունք ունի առաջադրելու պատգամավորի մեկ թեկնածու, կուսակցությունը կարող է պատգամավորի թեկնածու առաջադրել նաև իր կուսակցության անդամ չհանդիսացող անձին: Հավելենք, որ 2007 թվականի խորհրդարանական ընտրությունների ժամանակ թիվ 28 ընտրատարածքում առաջադրվել էր միայն ԲՀԿ նախագահ Գագիկ Ծառուկյանը: Նոր ընտրակարգով, սակայն յուրաքանչյուր ընտրատարածքում մեծամասնականով առաջադրվող թեկնածուների թիվն այժմ պետք է լինի առնվազն երկու:
