«Մարգագետնային ծաղիկներով և վարդերով նատյուրմորտը», որը 1974թ.-ից պահվել է հոլանդական Քրյոլեր Մյուլլեր թանգարանում, պարզվել է` պատկանում է Վան Գոգի վրձնին: Այս մասին հաղորդում է Reuters գործակալությունը:
Ռենտգեն-հետազոտությունը պարզել է, որ մեծն Վան Գոգն այս կտավը նկարել է 1886թ.-ին Փարիզում` կատարելով այն երկու մերկ ըմբիշների կտավի վրա, որը նկարել էր Անտվերպենում աշակերտ եղած ժամանակ: Ըմբիշներ նկարելու մասին Վան Գոգը հիշատակում է իր եղբոր` Թեոյի հետ նամակագրության ժամանակ, սակայն նատյուրմորտի մասին ոչ մի խոսք չէր ասվում:
Մասնագետները մինչև հիմա պնդում էին, որ կտավը շատ մեծ է` Վան Գոգի նկարներին ոչ բնորոշ չափերով: Եվ միայն մերկ ըմբիշների հայտնաբերումը ռենտգենի միջոցով հաստատեց, որ դա իրոք պատկանում է հոլանդացու վրձնին:
«Սա մեծ հայտնագործություն է: Աշխատանքի ժամանակ այնպիսի զգացողություն էր, կարծես այն դիտեիր Վան Գոգի մեջքի ետևից»,- The Daily Telegraph-ին ասել է Դելֆթի տեխնոլոգիական համալսարանի պրոֆեսոր Յորիս Դիքը, որը մասնակցել է հետազոտական աշխատանքներին:
Տեղեկացնենք, որ Օտերլոյում գտնվող Քրյոլեր Մյուլլեր թանգարանում է գտնվում Վան Գոգի նկարների ամենամեծ հավաքածուներից մեկը: «Մարգագետնային ծաղիկներով և վարդերով նատյուրմորտը» գնվել էր 1974թ.-ին` աճուրդի ժամանակ:
