Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում երեկ շարունակված 9 աղջիկների պոռնկությամբ շահագործելու գործով դատավարությունը կրկին հետաձգվել է:
Հիշեցնենք, որ այս գործով հիմնական մեղադրյալը աղջիկներին պոռնկության դրդած էջմիածինցի, «Մարտեր առանց կանոնների» ֆեդերացիայի նախկին նախագահ Համլետ Դավթյանը, ով նաև «Հրանտ Գրուպ» ընկերության տնօրեն, գործարար Հրանտ Դավթյանի հորեղբոր տղան է, վաղուց արդեն հիվանդության հիմքով ազատվել է: Մինչդեռ քրեական գործում ներքաշված 30-ամյա Արման Միքայելյանը, ով նաև «Իրավունքի ուժը և օրենքը» իրավապաշտպան կազմակերպության նախագահ Գոհար Գալստյանի որդին է, այս պահին կանգնած է 9 տարի ազատազրկման դատավճռի վտանգի առջև:
Մեղադրող դատախազ Անդրանիկ Հակոբյանը միջնորդել է դատարանին` Արման Միքայելյանի նկատմամբ պատիժ սահմանել 9 տարի ազատազրկմամբ: Այս պահին սեռական շահագործման նպատակով աղջիկներին հավաքագրած, նրանց պոռնկության պարտադրած և աղջիկների ստացած հոնորարներն անձամբ յուրացրած Համլետ Դավթյանը դատական նիստերին ընդհանրապես չի ներկայանում` հիվանդության պատճառաբանությամբ, ինչին ոչ տուժողները` սեռական շահագործման համար հավաքագրված աղջիկներն են հավատում, ոչ էլ` Արման Միքայելյանի մայրը: Մինչդեռ Արման Միքայելյանը մինչ օրս կալանավորված է այն մեղադրանքով, որ թիկնապահական ծառայություն մատուցելով Համլետ Դավթյանին, որոշակի վարձատրության դիմաց ամենօրյա հսկողություն է սահմանել պոռնկության նպատակով վերջինիս կողմից հավաքագրված և շահագործված աղջիկների նկատմամբ:
Այս գործով հերթական դատական նիստը տեղի կունենա մարտի 26-ին, որի ժամանակ Միքայելյանի երկրորդ պաշտպան Թամարա Պողոսյանը հանդես կգա պաշտպանական ճառով: