Կուսակցությունների գործունեությանը վերաբերող նյութերի լուսաբանմանը հեռուստաընկերություններում վերջերս ավելի հավասարակշիռ ուշադրություն է դարձվում, բացի այդ՝ նվազել են գնահատականներ պարունակող անդրադարձները: Այսօր կայացած մամուլի ասուլիսի ժամանակ այս մասին ասաց Երևանի մամուլի ակումբի նախագահ Բորիս Նավասարդյանը՝ ներկայացնելով ԱԺ ընտրությունների նախաշեմին հայաստանյան լրատվամիջոցներում մարտի 1-ից 10-ն անցկացված մշտադիտարկման միջանկյալ հաշվետվության տվյալները:
«Նախընտրական գործընթացների լուսաբանմանն առավել ակտիվորեն անդրադարձել են «Կենտրոն»-ը, Հ2-ը, «Երկիր Մեդիա»-ն, առավել քիչ՝ «Շանթ»-ը, որը նախընտրական գործընթացների լուսաբանմանը «Կենտրոն»-ից մոտ 15 անգամ քիչ եթերաժամ է հատկացրել: Կուսակցությունների հանդեպ ամենահամաչափ մոտեցումները դրսևորվել են Հ2-ում և Հանրային ռադիոյում»,- ասաց նա:
Բորիս Նավասարդյանի խոսքով՝ նոյեմբեր-դեկտեմբեր ամիսների համեմատ՝ եթերում նվազել են կուսակցությունների հասցեին գնահատական կամ թաքնված գովազդ պարունակող հաղորդումները: «Այս առումով կասկածներ հարուցող նյութերի հանդիպել ենք միայն ԲՀԿ-ի և ՕԵԿ-ի մասով: Միաժամանակ մոտ 30 դրական գնահատական պարունակող հաղորդում եղել է ՀՀԿ-ի ու ԲՀԿ-ի մասին: Բացասական գնահատականներ պարունակող 8 նյութից 6-ը եղել է ՀԱԿ-ի վերաբերյալ»,- նշեց նա:
Պատասխանելով հարցին՝ ինչո՞ւ է բոլոր եթերների, մասնավորապես Հ1-ի եթերում համապետական կարգով ամենաշատը խոսվում իշխող ՀՀԿ-ի մասին, Երևանի մամուլի ակումբի նախագահը նկատեց, որ քաղաքական ուժերը որոշակի ազդեցություն ունեն հեռուստաընկերությունների վրա, ինչն էլ անդրադառնում է վերջիններիս թվային ցուցանիշների վրա:
«Երկրորդ պատճառն այն է, որ ոչ բոլոր կուսակցություններն են նախընտրական շրջանում բավականաչափ ակտիվություն ցուցաբերում»,- նկատեց նա:
Անդրադառնալով լրագրողների՝ առաջիկա ԱԺ ընտրություններին մասնակցելու նպատակով այս կամ այն կուսակցության ցուցակում ներգրավվելու հարցին՝ Բորիս Նավասարդյանն ասաց, որ Հեռուստատեսության ու ռադիոյի ազգային հանձնաժողովը հետևողական է լինելու, որպեսզի վերջիններս արդեն ապրիլի 8-ից չերևան եթերում՝ հնարավորություն չունենալով իրականացնել իրենց քաղաքական ուժի քարոզչությունը:
