Թուրքական Radikal թերթի փոխանցմամբ՝ Հրանտ Դինքի ընտանիքն արձագանքել է Հրանտ Դինքին սպանած Օգյուն Սամասթին հերոսացրած և նրա հետ լուսանկարված ոստիկան Յաքուփ Քուրթարանի պաշտոնի բարձրացմանը, որը նշանակվել է Մալաթիայի անվտանգության ծառայության պետի տեղակալ:
Հրանտ Դինքի եղբայրը՝ Օրհան Դինքը, հայտարարել է. «Փաստորեն, դա վկայում է այն մասին, որ նրա պաշտոնը բարձրացրել են ոստիկանությունում ցուցաբերած բարձր արդյունքների համար և Հրանտ Դինքի ծննդավայր Մալաթիայում նշանակել են անվտանգության ծառայության պետի տեղակալ: Սա ծիծաղելի է, մեզ արդեն արտասվելն էլ է արգելված»:
Հիշեցնենք, որ Սամասթի հետ լուսանկարվելուց հետո Քուրթարանի նկատմամբ որպես պատժամիջոց էր սահմանվել նրան մեկօրյա աշխատավարձից զրկելը, սակայն Քուրթարանը բողոքարկել էր դա, ինչի հետևանքով չեղյալ էր հայտարարվել այդ պատժամիջոցը:
