7 մարդ է մահացել և շուրջ 30-ը ստացել են տարբեր աստիճանի վնասվածքներ Իրաքի հյուսիսում` Քիրքուկ նահանգի նույնանուն քաղաքում տեղի ունեցած պայթյունի հետևանքով: Պայթյունը տեղի է ունեցել մեքենայի մեջ տեղադրված ռումբի գործարկման հետևանքով: Այս մասին հաղորդում է Reuters-ը` հղում անելով տեղական ոստիկանությանն ու բժշկական ծառայությանը:
Գործակալության տվյալով` այսօր առավոտյան, բացի Քիրքուկի միջադեպից, Իրաքի տարբեր քաղաքներում տեղի են ունեցել մի քանի պայթյուններ ևս: Նշվում է 10 զոհի մասին: Քիրքուկում իրավիճակը չի հանդարտվում այդ նահանգի շուրջ տիրող անորոշության պատճառով: Համաձայն Իրաքի Սահմանադրության` Քիրքուկի ճակատագիրը պետք է վճռվի հանրաքվեի ժամանակ, իսկ մինչ այդ պետք է կատարվի ազգաբնակչության հաշվառում: Սակայն արաբներն ու թուրքմենները խոչընդոտում են դրա անցկացմանը:
