ՀՀԿ ցուցակով Ս. Սարգսյանը վերահաստատեց Արտաշես Գեղամյանին տված մականունը: «Առաջին լրատվական»-ի հետ զրույցում նման տեսակետ հայտնեց քաղաքագետների միության նախագահ Հմայակ Հովհաննիսյանը՝ անդրադառնալով երեկ հրապարակված ՀՀԿ համամասնական ցուցակին:
Քաղաքագետի համար հետաքրքիրն է այն, որ Շ. Պետրոսյանը և Արտաշես Գեղամյանը ՀՀԿ ընտրացուցակում կողք կողքի են հայտնվել: Ըստ նրա` գուցե դրանով Ս. Սարգսյանը ցանկանում է վերահաստատել այն երաժշտական մականունը, որը տվել է Գեղամյանին:
«Եթե չեմ սխալվում՝ Շուշան Պետրոսյանը 16-րդ տեղում է, իսկ Գեղամյանը՝ 17-րդ: Ես ՀՀԿ ցուցակում մի ազգանուն չտեսա, որը կկարողանար խորհրդանշել փոփոխությունները: 2008 թվականին, փորձելով արդարացնել իր դիրքորոշումը, որ հիմա իրագործվում է իր հեղինակած արարման ծրագիրը, այսինքն` հիմա Տիգրան Սարգսյանը իրագործում է Գեղամյանի արարման ծրագիրը, որի արդյունքներն այսօր մեր ժողովուրդը տեսնում է:
Թե այդ ինչ արարում էր, որը երեք տարիների ընթացքում բերեց տխուր արդյունքների և աղքատության ցուցանիշի 10 %-ով ավելացման… Եթե մարդը կարծում է, որ իր ծրագիրն է իրականացվում, հող է նախապատրաստում ՀՀԿ ցուցակով հանդես գալու համար, բայց դա ինչ կապ ունի փոփոխությունների տեսլականի հետ, որը Սերժ Սարգսյանը առաջ քաշեց ՀՀԿ համագումարում՝ չգիտեմ»,- մեկնաբանեց Հմայակ Հովհաննիսյանը` հավելելով, որ ՀՀԿ ցուցակում չկա գեթ մեկ անուն, որը կխորհրդանշեր Ս. Սարգսյանի` փոփոխությունների գնալու պատրաստակամությունը:
Քաղաքագետի խոսքով` ՀՀԿ ցուցակում մարդիկ են, ովքեր զբաղվել ՀՀԿ-ի գործողությունների, քայլերի գովաբանությամբ: Հիշեցնենք, որ արդեն հայտնի են կուսակցությունների գալիք ընտրություններին մասնակցության ընտրացուցակները:
