Երեկ Ադրբեջանի նախագահ Իլհամ Ալիևը, ելույթ ունենալով Ադրբեջանի կառավարության նիստի ժամանակ, որը նվիրված էր Ադրբեջանի սոցիալ-տնտեսական զարգացման 2010 և 2011 թթ.-ի խնդիրներին, ասել է, որ 2010թ. առաջընթաց չի արձանագրվել հայ-ադրբեջանական կարգավորման գործընթացում: Այս մասին գրում է Trend գործակալությունը:
«Հայաստանը փորձում է նորից վերադառնալ այն հարցերին, որոնք նախկինում համաձայնեցվել են բանակցությունների սեղանի շուրջ: Մի խոսքով, մեզ մոտ տպավորություն է ստեղծվում, որ չի ցանկանում ազատել գրավյալ տարածքները, ցանկանում է ինչքան հնարավոր է երկար օկուպացված պահել: Եվ դրանով փորձում է հասնել նրան, որ Լեռնային Ղարաբաղի կարգավիճակի հարցով Ադրբեջանից ստանա իրեն ձեռնտու պայմաններ»:
Նա կրկին պնդել է այն դիրքորոշումը, որ այս տարածքում երկրորդ հայկական պետություն չի կարող լինել, քանի որ դրանք պատմական ադրբեջանական տարածքներ են, իսկ միջազգային հանրությունն էլ ճանաչում է Ադրբեջանի տարածքային ամբողջականությունը և հարգում այն: Ալիևը վերահաստատել է նաև, որ պատրաստ է Լեռնային Ղարաբաղին տրամադրել ինքնավարության կարգավիճակ, իսկ աշխատանքն այնտեղ պետք է կազմակերպվի ժողովրդավարական սկզբունքների հիման վրա, ինչպես բոլոր քաղաքակիրթ երկրներում է:
Նա նաև թվել է Ադրբեջանի դիրքորոշմանը աջակցող այն փաստաթղթերը, որոնք ընդունվել են 2010թ.-ին` մատնանշելով, մասնավորապես, Եվրախորհրդարանում և ՆԱՏՕ-ի Խորհրդարանական վեհաժողովում ընդունված բանաձևերը:
Իսկ եթե այս հարցը բանակցություններով լուծում չստանա, նա հերթական անգամ հնչեցրել է այն պատերազմով լուծելու պատրաստակամության մասին իր վաղեմի թեզը. «Վստահ եմ, որ Ադրբեջանի ուժեղ բանակը պետք է ասի և կասի իր խոսքը հայ-ադրբեջանական, ղարաբաղյան հակամարտության կարգավորման ժամանակ, երբ դրա ժամանակը գա»,- եզրափակել է նա:
