Կատարյան Al-Jazeera հեռուստաալիքը հայտարարել է, որ իր տրամադրության տակ նյութեր ունի, որոնցում տեղեկություններ են պարունակվում ապստամբների ելույթները ճնշելու ուղղությամբ Սիրիայի հատուկ ծառայությունների կողմից մշակված ռազմավարության մասին: Այս մասին ասվում է հեռուստաալիքի ինտերնետ-կայքում:
Փաստաթուղթը բաղկացած է 1400 էջից, դրանում խոսվում է այն մասին, որ ցուցարարները ոչ մի դեպքում չպետք է մտնեն Դամասկոս, բացի այդ տեղեկություններ կան Իդլիբ և Հալեպ քաղաքներում ցուցարարների ելույթները ճնշելու մասին:
Փաստաթղթերից մեկում ուղղակի հրաման կա ֆինանսական և բարոյական աջակցություն ցուցաբերել Հալեպում Ասադի կողմնակիցներին:
Հեռուստաալիքը նշում է, որ փաստաթուղթը տրամադրվել է Աբդել Մաջիդ Բարաքաթի կողմից, որը մինչ վերջերս աշխատում էր կառավարությունում, ապա փախել էր Թուրքիա:
Նրա խոսքերով՝ ամեն օր ժամը 19:00-ին Դամասկոսում հավաքվում են հետախուզության և անվտանգության ծառայության աշխատակիցները և քննարկում օրվա ընթացքում տեղի ունեցած իրադարձությունները և նոր մարտավարություն մշակում:
