Թուրքական Milliyet թերթի փոխանցմամբ՝ հունվարի 4-ից սկսած՝ արդեն 75 օր է, ինչ Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) առաջնորդներից Ֆեհման Հուսեինը հայտարարություններ չի հնչեցնում:
Որոշակի աղբյուրների համաձայն՝ վերջին շաբաթներին PKK-ի դեմ անցկացված գործողությունների ժամանակ Ֆեհման Հուսեինը, ով ծնունդով Սիրիայից է և որի կեղծանունն է Բահոզ Էրդալ, ծանր վիրավորվել է: Նրանք հավաստիացնում են, որ այս պահին Ֆեհմանը գտնվում է Սիրիայում՝ նախագահ Բաշար Ասադի համակիրների մոտ:
Հիշեցնենք, որ այն բանից հետո, երբ անցյալ տարվա օգոստոսի վերջերին ԶԼՄ-ները տեղեկատվություն տարածեցին, թե Իրանի հատուկ ծառայությունները ձերբակալել են PKK-ի հիմնադիր Աբդուլլահ Օջալանի ձերբակալությունից հետո կազմակերպության փաստացի ղեկավար Մուրադ Քարայըլանին, թուրքական Milliyet թերթը գրել է, որ Քարայըլանի բացակայության պայմաններում PKK-ն ունի նոր փաստացի ղեկավար: Դա Ֆեհման Հուսեինն է:
