Շվեյցարիայում տուրիստական ավտոբուսի վթարի պատճառն անուղղակիորեն կարող էր հարուցել ուսուցիչներից մեկը, որը վթարից մի քանի վայրկյան առաջ, հավանաբար, շեղել է վարորդի ուշադրությունը` DVD-ֆիլմ դնելով նվագարկիչի մեջ: Այս մասին երկուշաբթի հայտարարել է RTBF հեռուստառադիոընկերությունը:
«Մի քանի երեխա հաստատել են, որ ավտովթարից վայրկյաններ առաջ DVD է դրվել նվագարկիչի մեջ, սակայն պարզ չէ` ով է դրանով զբաղվել: Երևում է` դա չի եղել վարորդը, այլ եղել է ուսուցիչներից մեկը, որը շեղել է վարորդի ուշադրությունը»,- նշված է հաղորդագրության մեջ:
Պատկերն ամբողջացնելու համար շվեյցարացի հետաքննիչները մի քանի օրից կմեկնեն Բելգիա` հարցաքննելու վթարից տուժած երեխաներին:
Այդ ժամանակահատվածում շվեյցարական ոստիկանությունը զբաղվում է ավտովթարի հանգամանքների ուսումնասիրությամբ:
Հիշեցնենք, որ ավտովթարը տեղի էր ունեցել մարտի 13-ի երեկոյան Վալե կանտոնի Սիեր քաղաքում: Դեռևս չպարզված պատճառներով ավտոբուսը կորցրել է կառավարումը և բախվել թունելի պատին: Վթարի հետևանքով զոհվել է 28 մարդ, այդ թվում՝ 22 երեխա: Ավելի քան 20 երեխաներ տարբեր աստիճանի վնասվածքներ են ստացել, 2 աղջիկ շարունակում են մնալ կոմայի մեջ:
